OPEC və OPEC+ ölkələrindən bir neçəsi neft hasilatını könüllü azaltmaqla bağlı müddəti artırıb
Bakı, 4 mart, AZƏRTAC
Səudiyyə Ərəbistanı, Əlcəzair və Küveytin neft hasilatında etdikləri könüllü azalma daha 3 ay uzadılacaq.
AZƏRTAC “Anadolu” agentliyinə istinadən xəbər verir ki, Səudiyyə Ərəbistanı Energetika Nazirliyinin rəsmisi tərəfindən verilən açıqlamada, neft hasilatının könüllü azalmasının iyun ayının sonuna qədər uzadıldığı və gündəlik 9 milyon barel hasilatın həyata keçiriləcəyi bildirilib.
Əlcəzair Energetika Nazirliyindən verilən açıqlamada, Əlcəzairin gündəlik neft hasilatını 51 min barel azaldılaraq 908 min barelə endirəcəyi qeyd edilib.
Küveyt Xəbər Agentliyi (KUNA) könüllü neft azaldılması müddətinin iyunun sonuna qədər artırıldığı və hasilatın 135 min barel azalaraq gündəlik 2 milyon 413 min barel neft hasil ediləcəyini diqqətə çatdırıb.
Qeyd edək ki, Rusiyanın Baş nazirinin müavini Aleksandr Novak da ölkəsinin bu ilin ikinci rübündə könüllü neft hasilatını və ixracını gündəlik 471 min barel azaldacağını açıqlayıb.
Bölmənin digər xəbərləri
