OPERA TEATRI YENİ TAMAŞA HAZIRLAYACAQ
Bakılıları, opera musiqisi pərəstişkarlarını bu ilin sonunadək maraqlı görüş gözləyir. Azərbaycan Dövlət Akademik Opera və Balet Teatrının bədii şurası xalqımızın böyük şairəsi, el arasında Xan qızı adı ilə məhşur olan Xurşid Banu Natəvanın 170 illiyi ilə əlaqədar xalq artisti, bəstəkar Vasif Adıgözəlovun yazdığı “Natəvan” operasını tamaşaya qoyulmaq üçün yekdilliklə bəyənmişdir.
Operada hadisələr Qarabağda azadlıq hərəkatı fonunda cərəyan edir. Əsər üç pərdə və altı şəkildən ibarətdir. Libretto müəllifi Nazim İbrahimovdur.
Operanın qəhrəmanı təkcə valehedici şerlərin müəllifi cazibədar qadın kimi deyil, həm də siyasi xadim, doğma Qarabağ, onun torpağının hər qarışı uğrunda fədakarlığa hazır olan mübariz insan kimi təsvir edilir. Natəvan pərakəndə düşmüş Azərbaycan xanlıqlarının birləşdirilməsi arzusu ilə yaşayır və bu birliyin naminə müxtəlif addımlar atır. Vasif Adığözəlov o dövrdə Qarabağdakı vəziyyəti, oradakı ab-havanı musiqi vasitəsilə dinləyiciyə çatdırmağa çalışmışdır. Müəllif Natəvanın hərarətli dili ilə Qarabağı azad etməyə, Şuşanı geri qaytarmağa çağırır.
Bəstəkarın buna nə dərəcədə nail olduğunu isə dinləyicilər, operanın tamaşaçıları qiymətləndirəcəklər.
Bədii şuranın iclasında operanın quruluşu üzərində işləyəcək yaradıcı qrup da təsdiq edilmişdir. Operanın musiqi rəhbəri və dirijoru - Yalçın Adıgözəlov, rejissoru - teatrın baş rejissoru Hafiz Quliyev, quruluşçu rəssamı isə Tahir Tahirovdur.
Bölmənin digər xəbərləri
