Orxan Məmmədov: Kənd təsərrüfatı KOB subyektlərinin daha çox fəaliyyət göstərdiyi sektorlardandır
Bakı, 30 noyabr, AZƏRTAC
Ölkəmizdə aqrobiznes sahələrinin inkişafı üçün daha əlverişli mühitin formalaşması sosial-iqtisadi inkişaf siyasətinin prioritet vəzifələrindən biridir.
AZƏRTAC xəbər verir ki, bunu KOBİA-nın İdarə Heyətinin sədri Orxan Məmmədov “Fermerlərin dəstəklənməsi və dövlət-özəl sektoru əməkdaşlığı” tədbirindəki çıxışında bildirib.
Onun sözlərinə görə, kənd təsərrüfatı KOB subyektlərinin də daha çox fəaliyyət göstərdiyi sektorlardandır. Buna görə də, aqrobiznes fəaliyyətinin qurulmasına və inkişaf etdirilməsinə istiqamətlənmiş dəstək tədbirlərinin həyata keçirilməsi KOBİA-nın da fəaliyyət gündəliyinə daxildir.
"KOBİA aqrobiznesi prioritet sahə kimi diqqətdə saxlamaqla, bu sahənin nümayəndələri ilə əməkdaşlığa xüsusi önəm verir. İstehsal, emal və satış istiqamətlərində aqrobiznesin inkişafına və sahibkarlıq subyektlərinin qarşılaşdıqları risklərə və çətinliklərə dair mütəmadi olaraq maraqlı tərəflərlə görüşlər keçirilir, müzakirələr aparılır", - deyə O.Məmmədov bildirib.
Orxan Məmmədov onu da əlavə edib ki, dövlət-özəl əməkdaşlığı çərçivəsində bu potensialın reallaşdırılması qarşıdakı illərdə aqrar və qida sənayesinin, nəticədə isə ölkə iqtisadiyyatının inkişafına öz müsbət töhfəsini verəcək.
Bölmənin digər xəbərləri
