Osakada Olimpiya məşəli estafeti ümumi istifadə üçün yollardan kənarda keçirilir
Tokio, 13 aprel, AZƏRTAC
Yaponiyanın qərbində yerləşən Osaka prefekturası bu ərazidə aprelin 13-də başlayan Olimpiya məşəli estafetini koronovirusun yayılmasının qarşısını almaq məqsədilə ümumi istifadə üçün yollardan kənarda, qapalı parkda təşkil edib.
AZƏRTAC NHK telekanalına istinadla xəbər verir ki, ilkin olaraq estafetin ümumi istifadə üçün yollarda keçirilməsi planlaşdırılsa da, pandemiyaya görə yerli hökumət bundan imtina edib. Əvəzində tədbirin ümumi uzunluğu 3 kilometr təşkil edən məşhur “Günəş qülləsi” ətrafında və Suyta siti-dəki “Expo-70” xatirə parkında keçirilməsi məqsədəuyğun hesab edilib.
Məşəlin ilk daşıyıcısı aktyor Kataoka Aynosuke olub. Bildirilir ki, Osakada iki gün davam edəcək məşəl estafetində təqribən 180 qaçışçı iştirak edəcək.
Yerli hökumət tədbirin keçiriləcəyi əraziyə əhalini buraxmayıb. Yalnız hər bir qaçışçıya dörd nəfər ailə üzvünü və ya digər yaxın şəxsləri tamaşaçı kimi tədbirə dəvət etməyə icazə verilib.
Eyni zamanda, estafetin başa çatması mərasimi də sadələşdirilmiş şəkildə, tamaşaçılar olmadan keçiriləcək və onlayn yayımlanacaq.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
