ÖTƏN İL ASTARA RAYONUNDA ANA VƏ UŞAQ ÖLÜMÜ QEYDƏ ALINMAMIŞDIR
Astara, 1 fevral (AZƏRTAC). Astara Rayon Mərkəzi Xəstəxanasından bildirmişlər ki, 2008-ci ildə doğum şöbəsində uşaq və ana ölümü qeydə alınmamışdır.
İyirmi beş çarpayılıq doğum evində anaların və dünyaya göz açan körpələrin sağlamlığını qorumaq üçün hər cür şərait yaradılmışdır. Bu səhiyyə ocağı əsaslı təmir edildikdən sonra müasir tibbi avadanlıq və lazımi ləvazimatlarla təmin edilmişdir. Ötən il burada əvvəlki ildəkindən 90 uşaq çox-658 uşaq, o cümlədən 7 əkiz dünyaya gəlmişdir. Əgər 2007-ci ildə doğum evində 1 uşaq ölmüşdüsə, yola saldığımız ildə burada ölüm halı qeydə alınmamışdır.
2009-cu ilin Azərbaycanda “Uşaq ili” elan edilməsi ilə bağlı doğum evində ana və uşaq ölümünə yol verməmək başlıca vəzifə kimi qarşıya qoyulmuşdur. Bu məqsədə çatmaq üçün şöbənin kollektivi 2009-cu ilin ilk ayından başlayaraq hamilə qadınlar arasında tibbi-profilaktiki tədbirlər həyata keçirir.
Bölmənin digər xəbərləri
