ÖTƏN İL ÇEXİYAYA GƏLƏN AZƏRBAYCAN TURİSTLƏRİNİN SAYI 30 FAİZ ARTMIŞDIR
Aprelin 17-də Heydər Əliyev adına İdman-Konsert Kompleksində 7-ci Azərbaycan “Səyahət və Turizm” və 2-ci Azərbaycan “Hotel biznesi” beynəlxalq sərgiləri çərçivəsində Çexiyanın turizm potensialını nümayiş etdirən “Çexiya - duyğu simfoniyası” adlı təqdimat mərasimi keçirilmişdir.
Çexiya Respublikasının Milli Turizm İdarəsinin nəzdində fəaliyyət göstərən “Çex - Turizm” şirkətinin nümayəndəsi Helena Svobodova AZƏRTAC-ın müxbiri iIə söhbətində bildirmişdir ki, təmsil etdiyi təşkilat əsasən ölkəsinin turizm potensialının təbliği istiqamətində müxtəlif layihələr həyata keçirir.
Çexiya şirkətlərinin ilk dəfə Bakıda sərgidə çıxış etdiklərini deyən qurumun rəsmisi söyləmişdir ki, “Azərbaycanın iqtisadi inkişafı, xalqınızın firavan həyatı turizm sahəsində biznes əlaqələrinin qurulması üçün münbit şərait yaradır”.
H.Svobodova demişdir ki, “2007-ci ildə Çexiya Azərbaycandan gələn turistlərin sayı 30 faiz artmışdır. Bu rəqəm qənaətbəxş olsa da, hesab edirik ki, bu göstərici daha çox ola bilər. İlk növbədə birbaşa hava reysinin olmaması və səfirliyimizin Tbilisidə yerləşməsi Azərbaycandan Çexiyaya turist axınının gəlməsinə əngəl törədir. Biz bu kimi məsələləri tezliklə həll etmək niyyətindəyik. Artıq qərara almışıq ki, vətənə qayıdandan sonra bununla bağlı Çexiya Xarici İşlər Nazirliyinə məktubla müraciət edək”.
Bölmənin digər xəbərləri
