Özbəkistanın paytaxtında “Caspian Energy Investment Forum Tashkent - 2023” keçiriləcək
Bakı, 3 may, AZƏRTAC
Mayın 17-də Özbəkistanın paytaxtında “Caspian Energy Investment Forum Tashkent - 2023” təşkil olunacaq.
AZƏRTAC xəbər verir ki, bu barədə Özbəkistanın Azərbaycandakı səfiri Bahrom Əşrəfxanovun “Caspian Energy Club” İdarə Heyətinin sədri və qrupun baş icraçı direktoru Telman Əliyevlə görüşündə bildirilib.
Tədbirin gündəliyinə qarşılıqlı ticarət, investisiya mübadiləsi, nəqliyyat-logistika, enerji və s. məsələlərin daxil edilməsi planlaşdırılır. Görüşün məqsədi ticarət-iqtisadi və investisiya mübadiləsi sahələrində Özbəkistan-Azərbaycan əməkdaşlığının təşviqində əməkdaşlıq məsələlərini müzakirə etmək olub. Nəticədə iki ölkənin işgüzar dairələri arasında qarşılıqlı faydalı əlaqələrin inkişafına yönəlmiş tədbirlər kompleksinin birgə həyata keçirilməsinə dair razılıq əldə edilib.
Bildirilib ki, fəaliyyət çərçivəsində mayın ortalarında Özbəkistanın paytaxtında “Caspian Energy Investment Forum Tashkent - 2023” təşkil olunacaq. Forumda Xəzər, Qara dəniz və Baltikyanı region ölkələrinin dövlət qurumlarının və şirkətlərinin rəhbərləri və nümayəndələri iştirak edəcəklər. Forum çərçivəsində G2B və B2B görüşləri keçiriləcək.
Bölmənin digər xəbərləri
