PARLAMENT XƏBƏRLƏRİ
Səfər müddətində deputatlarımız Qara Dəniz İqtisadi Əməkdaşlıq Təşkilatı Parlament Məclisinin iqtisadiyyat, ticarət, texnologiya və ekologiya məsələləri Komitəsinin iclasında iştirak edəcəklər.
Tədbirdə turizm sənayesinin inkişafı, tarixə yeni baxış və onun dövlətlərarası münasibətlərə təsiri və digər məsələlər ətrafında fikir mübadiləsi aparılacaqdır.
Deputatlarımız gündəliyə çıxarılacaq sənədlərə münasibətlərini bildirəcək, qeyd və təkliflərini verəcəklər.
X X X
Milli Məclisin deputatı Mixail Zabelin “Rusiya-Azərbaycan dostluğu”na həsr olunmuş tədbirlərdə iştirak etmək üçün martın 10-dan 12-dək Moskvada səfərdə olacaqdır.
Ümumrusiya Azərbaycan Konqresinin təşkil etdiyi bu tədbirlə yanaşı, deputatımız Rusiya Federasiyası Federal Məclisinin üzvləri və Rusiyada yaşayan azərbaycanlılarla görüşlər də keçirəcəkdir.
X X X
Avropa Şurası Venesiya Komissiyasının üzvü, Milli Məclis Aparatının dövlət quruculuğu üzrə qanunvericilik şöbəsinin müdiri Lətif Hüseynov komissiyanın plenar iclasında iştirak etmək üçün martın 10-dan 12-dək Venesiyada səfərdə olacaqdır.
Burada Gürcüstanın, Bosniya və Hersoqovinanın konstitusiyalarına dəyişikliklər, Albaniyanın Seçki Məcəlləsi, “Ukraynada milli azlıqlar haqqında” Qanun və digər məsələlər müzakirə ediləcəkdir.
Sonra Milli Məclis Aparatının şöbə müdiri Lətif Hüseynov Avropa Şurasının İrqçilik və dözümsüzlük əleyhinə Komissiyasının yaradılmasının 10 illiyinə həsr edilmiş tədbirlərdə iştirak etmək üçün Strasburqa gedəcəkdir.
