PARLAMENT XƏBƏRLƏRİ
Milli Məclisin deputatı İlham Əliyevin başçılığı ilə parlament nümayəndə heyəti Avropa Şurası Parlament Assambleyasının növbəti sessiyasında iştirak etmək üçün sentyabrın 22-dən 29-dək Strasburqda səfərdə olacaqdır.
Nümayəndə heyətinin tərkibinə deputatlardan Səməd Seyidov, Gültəkin Hacıyeva, Nairə Şahtaxtinskaya, Qulamhüseyn Əliyev, Vaqif Vəkilov, Rəfael Hüseynov və Milli Məclis Aparatının beynəlxalq münasibətlər şöbəsinin müdiri Azər Qasımov daxildirlər. Sessiyada terrorizmə qarşı mübarizə, Avropa şəhərlərində təhlükəsizliyin təmin edilməsi, cinayətkarlığın qarşısının alınması, Ukraynada, Gürcüstanda monitorinq prosesinin gedişi, regional münaqişələrin həlli yolları, miqrantlar və qaçqınların ailə hüququ məsələləri müzakirə ediləcəkdir.
Deputatlar müzakirə zamanı bir sıra aktual məsələlərə Azərbaycan tərəfinin münasibətini bildirəcək, qeyd və təkliflərini verəcəklər.
x x x
Milli Məclisin deputatı Əli Abbasov “Silahlı qüvvələrə parlament nəzarəti sahəsində Şərqi Avropa ölkələrinin təcrübəsi: nailiyyətlər və problemlər” mövzusunda keçiriləcək beynəlxalq seminarda iştirak etmək üçün sentyabrın 23-dən 29-dək Kiyevdə səfərdə olacaqdır.
Konfrans Ukrayna parlamenti yanında Milli Strateji Araşdırmalar İnstitutunun və silahlı qüvvələrə demokratik nəzarət üzrə Cenevrə Mərkəzinin təşəbbüsü ilə keçirilir.
Konfransda silahlı qüvvələrə parlament nəzarətinin mexanizmi, bu sahədə qarşıya çıxan çətinliklər, silahlı qüvvələrin fəaliyyətinin hüquqi tənzimlənməsi və sair məsələlər müzakirə olunacaqdır.
Milli Məclisin mətbuat xidməti
Bölmənin digər xəbərləri
