“People's Daily online”: Çin turistləri Azərbaycanı seçirlər
Bakı, 5 iyul, AZƏRTAC
Çinin turizm platformaları çinlilərin Azərbaycana səyahət etmək marağının artdığını qeyd edir.
AZƏRTAC xəbər verir ki, bu barədə “Çin səyahət platformaları çinli səyahətçilər üçün vizasız siyasət elan etdikdən sonra Azərbaycan üzrə axtarış sorğularının artdığını qeyd edir” sərlövhəli məqalədə deyilir. Məqalə bu gün Çinin ən böyük qəzeti “Jenmin jibao”nun ingilis dilli versiyası olan “People's Daily” saytında dərc edilib.
Çinin milli onlayn səyahət platforması olan “Trip.com”un məlumatına görə, Azərbaycan Çin vətəndaşları üçün birillik vizasız rejim tətbiq edəcəyini elan etdikdən sonra ölkəmizə aid səyahət məhsulları üzrə axtarışların həcmi 50 faiz artıb.
Məqalədə qeyd olunur ki, yay səyahətinin pik dövründə Azərbaycana səyahət edən çinli turistlərin sifarişlərinin həcmi ötən illə müqayisədə 85 faiz artıb. Populyarlığın artmasına Çinin paytaxtından və Çin Xalq Respublikasının Sincan-Uyğur muxtar rayonunun inzibati mərkəzi olan Urumçi şəhərindən Bakıya birbaşa aviareyslərin açılması da kömək edib.
Digər məşhur “Fliggy” onlayn səyahət platforması dünən “Global Times”a bildirib ki, iyulun 4-nə olan məlumata görə, 2024-cü ildə Azərbaycana uçuş sifarişləri 336 faiz artıb.
Nəşr xatırladır ki, vizasız rejimin tətbiqi iyulun 3-də Şanxay Əməkdaşlıq Təşkilatının Astanada keçirilən Zirvə toplantısı zamanı imzalanmış Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə ilə nəzərdə tutulub.
Bölmənin digər xəbərləri
