Peşə seçimi ilə əmək bazarının tənzimlənməsi məsələsi müzakirə edilib
Bakı, 21 dekabr, AZƏRTAC
Azərbaycan Respublikasının Gənclər Fondunun dəstəyi, “Dostluq Gənclərin Əlaqələndirmə Mərkəzi” İctimai Birliyinin təşkilatçılığı ilə “Azərbaycan Respublikasında davamlı insan inkişafı naminə peşə seçiminin əhəmiyyəti” layihəsi çərçivəsində təlim keçirilib.
Dövlət İdarəçilik Akademiyasından (DİA) AZƏRTAC-a bildiriblər ki, tədbirdə çıxış edən “Dostluq Gənclərin Əlaqələndirmə Mərkəzi”nin sədri Yusif Ağayev davamlı insan inkişafı baxımından peşə seçiminin təbii sərvətlərlə zəngin olan ölkələr üçün xüsusi önəm daşıdığını söyləyib. Qeyd edilib ki, son illərdə gedən proseslər onu göstərir ki, dünya sürətlə dəyişməkdədir. Bu dəyişiklik bütün sahələrdə özünü göstərir. Risklər artır, ölkələrarası rəqabət şiddətlənir, ali təhsillə əmək bazarı arasında ciddi dəyişikliklər baş verir. Bundan sonra yalnız innovativ, inklüziv, çevik və bilik üzərində qurulan strategiyaları olan ölkələr uğur əldə edə biləcək.
Mərkəzin rəhbəri bildirib ki, Prezident İlham Əliyevin irəli sürdüyü “qara qızılın insan kapitalına” çevrilməsi konsepsiyası məhz problemin əhəmiyyətini aydın şəkildə izah edir. Azərbaycanın müəyyən etdiyi inkişaf strategiyası məhz bu istiqamətdədir. Davamlı inkişaf strategiyası ölkənin bu gününə, gələcəyinə və dünyanın qorunmasına istiqamətlənməlidir. Bütün resurslar elə istifadə edilməlidir ki, həm inkişaf davamlı olsun, həm də dünya deqradasiyadan qorunsun. Bu hədəflərə çatmaq və töhfə vermək vətəndaş cəmiyyətinin təmsilçisi olaraq bizi də düşündürür və problemin həllinə töhfə verməyə təşviq edir.
Qeyd edilib ki, layihənin ideyası DİA-nın rektoru, akademik Urxan Ələkbərovun “Davamlı inkişafdan ekoloji sivilizasiyaya: ali təhsil və əmək bazarı” məqaləsindən qaynaqlanıb. Məqsəd cəmiyyətin tələblərinə uyğun səriştə əsaslı ilk peşə və orta ixtisas təhsili standartlarının, əmək bazarının tələbinə uyğun peşələr və ixtisaslar üzrə peşə və orta ixtisas təhsilli kadr və mütəxəssis hazırlığının təmin edilməsi, müasir peşə-tədris mərkəz və komplekslərin yaradılmasıdır.
Ali və peşə təhsili üzrə tədqiqat aparan, bu sahədə nəzəri və praktik biliklərə malik olan ekspertlər - iqtisad üzrə fəlsəfə doktoru Elşən Əhmədov, fəlsəfə üzrə fəlsəfə doktoru, dosent Sakit Əliyev, Mübariz Şərifov, Əliyar Musayev, siyasi elmlər üzrə fəlsəfə doktoru Cahangir Cahangirli, Coşqun Ələkbərov, Murad Həsənxanlı, Qazi Zərif, Xədicə Əliyeva, “AQRO” Konsultasiya Mərkəzinin rəhbəri Cavidan Ağazadə çıxışlarında peşə təhsilinin konsepsiyası və prinsiplərinin təşviq olunmasını vacib hesab ediblər. Qeyd olunub ki, hər kəs öz bacarığını bilməli, inkişaf etdirməli və sahəsi üzrə peşəkar mütəxəssis kimi özünü formalaşdırmalıdır. Düzgün peşə seçimi və sevdiyin işlə məşğul olmaq insanın zövqlü və rahat yaşayışının təminatıdır. Eyni zamanda, bu, cəmiyyətdə məşğulluq probleminin həll edilməsi baxımından zəruridir.
Tədbirdə 50-dən çox iştirakçı çıxış edib. Peşə təhsilinin əhəmiyyəti, bu sahənin stimullaşdırılması və digər məsələlər müzakirə olunub.
Təlimin sonunda iştirakçılara sertifikat, buklet, əyani vəsaitlər təqdim edilib.
Bölmənin digər xəbərləri
