Peşəkar kadrların hazırlandığı Naxçıvan Hərbi Kollecindən reportaj FOTO
Naxçıvan, 5 noyabr, Nail Əsgərov, AZƏRTAC
Vətən müharibəsindən sonra ölkəmizin müdafiə potensialının gücləndirilməsi və hərbi qüdrətinin artırılmasına xidmət edən ordu quruculuğu siyasəti yeni mərhələyə qədəm qoyub. Bu xüsusda diqqətçəkən məqamlardan biri də müharibənin, döyüş təcrübəsinin, eyni zamanda, müasir hərb sistemi əsas götürülərək geniş islahatların reallaşdırılmasıdır. Ötən il dekabrın 14-də Prezident İlham Əliyevin müvafiq Fərmanına əsasən ölkənin üç şəhərində - Bakı, Gəncə və Naxçıvanda xüsusi təyinatlı orta ixtisas təhsili müəssisələrinin yaradılması da ordu quruculuğu, peşəkar hərbiçi kadrların hazırlanması istiqamətində yeni perspektivlər vəd edən sistemli tədbirlərin tərkib hissəsidir.
AZƏRTAC-ın Naxçıvan bürosunun əməkdaşı 2024-2025-ci tədris ilindən qapılarını müəllim və kursantlara açan Milli Müdafiə Universitetinin tabeliyindəki Naxçıvan Hərbi Kollecində yaradılan təhsil, təlim şəraiti ilə tanış olub, xüsusi təyinatlı orta ixtisas təhsili müəssisəsinin Azərbaycan hərb təhsilində rolu, ordumuzun komplektləşdirilməsi işində, kadr təminatında əhəmiyyəti və potensial imkanları barədə suallara aydınlıq gətirib.
Hərbi kollecin İdeoloji və mənəvi-psixoloji təminat bölməsinin rəisi, mayor Elvin Qurbani xüsusi təyinatlı orta ixtisas məktəbinin yaradılmasının gələcəkdə ordu quruculuğuna mühüm töhfələr verəcəyini deyib: “Azərbaycan Ordusunun müasir tələblərə uyğun tələbatını qarşılamaq üçün maddi-texniki bazanın, silah və texnikaların müasirləşdirilməsi ilə yanaşı, peşəkar gizir kadrlarının hazırlanması üçün hərbi kolleclərin yaradılması mühüm əhəmiyyətə malikdir. Müasir döyüşlər peşəkarların döyüşüdür. Peşəkarların əməliyyatlara əhəmiyyətli təsiri danılmazdır. Həmin amil özünü 44 günlük Vətən müharibəsində də göstərdi. Bu baxımdan Azərbaycan Ordusu üçün də yeni nəsil silah-sursatlardan, müxtəlif təyinatlı texniki vasitələrdən bacarıqla istifadə etmək məqsədilə peşəkar gizirlərin yetişdirilməsinin vacibliyini xüsusi qeyd etmək lazımdır. Bu məsələlər Naxçıvan Hərbi Kollecinin ölkəmizin, muxtar respublikanın müdafiəsində dayanan hərbi hissələr üçün nə dərəcədə lazımlı olduğunu göstərir. Həmçinin Naxçıvanın blokadada olması faktını da nəzərə alsaq, bu kollecin yaradılması, fəaliyyətə başlaması Vətənimizin müdafiəsində durmaq arzusunda olan gənclərlə hərbi hissələrdə peşəkar kadr balansının saxlanılması üçün də böyük əhəmiyyətə malikdir”.
Müsahimizin sözlərinə görə, Naxçıvan Hərbi Kolleci Azərbaycan Respublikası Müdafiə Nazirliyinin strukturuna daxil olan Milli Müdafiə Universitetinin tabeliyində fəaliyyət göstərən, müxtəlif ixtisaslar üzrə orta ixtisas təhsili və əlavə təhsil proqramlarını həyata keçirən xüsusi təyinatlı orta ixtisas təhsili müəssisəsidir. Kollecin fəaliyyətinin əsas məqsədi Azərbaycan Ordusu üçün orta ixtisas təhsilli subbakalavr peşə-ixtisas dərəcəli mütəxəssislər hazırlamaq və əlavə təhsil üzrə kadr hazırlığını həyata keçirməkdir. Ümumilikdə 4 hektar ərazidə yerləşən 7 binadan və yardımçı qurğulardan ibarət olan hərbi kollecin təhsil kampusu zəngin maddi-texniki bazaya malikdir. Arxitektura baxımından mükəmməl 2 tədris korpusunda yüksək zövqlə dizayn edilmiş mühazirə, məşğələ otaqları, kabinə və mərkəzlər mövcuddur. Dərslər hərbi nizamnaməyə uyğun olaraq, həm nəzəri, həm də praktiki şəkildə tədris olunur. Təlim prosesində ən son modifikasiyalı texnologiyalardan istifadə edilir. Burada elektron zalları, zəngin kitab fondu olan üçmərtəbəli kitabxana binası, kursantların sağlamlığı və fiziki hazırlığının daim diqqət mərkəzində saxlanılması məqsədilə idman zalı, futbol meydançası, müxtəlif idman qurğuları, mədəni-kütləvi tədbirlərin keçirilməsi üçün klub-konfrans zalı, hər cür şəraitə malik müasir yataqxana, həmçinin üçmərtəbəli sosial xidmət mərkəzi fəaliyyət göstərir.
Kollecdə kursantların fiziki hazırlığı qarşıya qoyulan prioritet məqsədlərdən biridir. Belə ki, Vətən müharibəsi döyüşdə fiziki hazırlığın nə qədər əhəmiyyətli olduğunu bir daha sübut etdi. Ona görə də Naxçıvan Hərbi Kollecində kursantların fiziki hazırlığı, xüsusilə əlbəyaxa döyüş və digər idman növləri üzrə dərnəklər fəaliyyət göstərir. Bu dərnəklər xüsusi bacarıqlı, peşəkar zabit və müəllimlər tərəfindən təşkil olunur. Həmçinin kursantların azərbaycançılıq ideologiyası ruhunda yetişdirilməsi üçün nəzəri və praktik dərslər, məşğələlər ən yeni və müasir üsullardan istifadə olunaraq keçirilir.
Naxçıvan Hərbi Kollecinə qəbul qaydaları, kursantlar üçün yaradılan geniş təminat imkanları barədə danışan Elvin Qurbani qeyd edib ki, kollecə qəbul “Hərbi vəzifə və hərbi xidmət haqqında” və “Təhsil haqqında” Azərbaycan Respublikasının qanunlarına uyğun həyata keçirilir. Müəssisədə orta ixtisas təhsili pilləsinə tam orta təhsili olan şəxslər, zabit hərbi rütbəsi olmayan hərbi qulluqçular və hərbi vəzifəlilər qəbul edilir. Namizədlər Müdafiə Nazirliyi tərəfindən sağlamlıq vəziyyətinin müayinəsinin nəticələrinə əsasən seçilir. Kursant adını qazananlar Azərbaycan dilində, iki il müddətində əyani formada təhsil və bu müddətdə ödənişsiz yataqxana, gündə 3 dəfə yeməklə təmin olunurlar. Həmçinin onlar üçün müəyyən məbləğdə birdəfəlik və təhsil müddətində aylıq ödəmələr təsis edilib.
Regionda cərəyan edən hadisələr, xarici təhdidlər ölkəmizin hərbi qüdrətinin artırılmasını, bütün tapşırıqları dəqiqliklə yerinə yetirə bilən müasir orduya, çevik xüsusi təyinatlı bölmələrə malik olmasını şərtləndirir. Bu baxımdan ən yeni texnoloji biliklərə, innovativ təlim bacarıqlarına yiyələnən kadrlara da ciddi ehtiyac var. Əminik ki, bu il fəaliyyətə başlayan Naxçıvan Hərbi Kolleci gələcəkdə ordumuzun kadr təminatında, Vətənimizin müdafiəsində mühüm rol oynayacaq, xüsusi təyinatlı təhsil müəssisəsinin məzunları öz peşələrinin qəhrəmanlarına çevriləcəklər.
Bölmənin digər xəbərləri
