Polisin ən böyük gücü vətəndaşa olan etimaddır - ŞƏRH
Bakı, 2 iyul, AZƏRTAC
Azərbaycan polisinin 108 illik fəaliyyətinə yalnız hüquq-mühafizə orqanının tarixi kimi baxmaq düzgün olmaz. Bu tarix, əslində, Azərbaycan dövlətçiliyinin keçdiyi yolun mühüm bir hissəsidir. Qanunun aliliyinin, ictimai sabitliyin təmin edilməsində polisin rolu mütləq və danılmazdır. Azərbaycan polisinin 108 illik tarixində çox mürəkkəb dövrlər də yaşanılıb. Xüsusilə ölkədə hökm sürən xaos, cinayətkarlığın artması və dövlət institutlarının ciddi sınaqlarla üzləşməsi polisin qarşısında son dərəcə ağır vəzifələr qoyub. Məhz Ümummilli Lider Heydər Əliyevin hakimiyyətə qayıdışından sonra qayda-qanun bərpa edildi, hüquq-mühafizə sistemi yenidən təşkil olundu və polis dövlətçiliyin əsas dayaqlarından birinə çevrildi.
Bu fikirləri AZƏRTAC-a açıqlamasında “Konstitusiya” Araşdırmalar Fondunun rəhbəri Əliməmməd Nuriyev səsləndirib.
O deyib ki, Prezident İlham Əliyev Ulu Öndərin müəyyən etdiyi siyasəti uğurla davam etdirərək hüquq-mühafizə orqanlarının müasir dövrün tələblərinə uyğun inkişafı, maddi texniki bazasının gücləndirilməsi, rəqəmsal texnologiyaların tətbiqi, peşəkar kadr hazırlığı və vətəndaş məmnunluğunu prioritet istiqamətlər təyin edib: “Daxili İşlər Nazirliyi yanında İctimai Şuranın sədri kimi bölgələrdə mütəmadi görüşlərdə iştirak edirik. İnsanlar artıq polisə təkcə cinayət baş verəndən sonra müraciət etmirlər. Dələduzluq, ailədaxili münasibətlər, təhlükəsizliklə bağlı narahatlıqlar, o cümlədən hüquqi izah tələb edən məsələlər də müraciətlərin mövzusuna çevrilir. Bu isə onu göstərir ki, polisin cəmiyyətdə rolu dəyişib, ona olan ictimai gözlənti daha da artıb. Ona görə də bu 108 ili keçilmiş yol kimi yox, davam edən inkişaf prosesi kimi qiymətləndirirəm”.
Əliməmməd Nuriyev vurğulayıb ki, hüquq-mühafizə orqanlarında həyata keçirilən islahatlar sadəcə qəbul olunmuş qərarlarla ölçülməməlidir. “Əsas məsələ həmin islahatların gündəlik xidmətdə hansı nəticəni verməsidir. Hesab edirəm ki, ən mühüm dəyişiklik polis fəaliyyətinin fəlsəfəsində baş verib. Bu gün polis yalnız hüquq pozuntusuna reaksiya verən deyil, o, eyni zamanda, cinayətlərin profilaktikası ilə məşğul olan, riskləri qabaqlayandır. Təkcə xidmət göstərən deyil, vətəndaşa əl uzadandır. Polis orqanının fəaliyyəti ilə bağlı qanunvericilik təkmilləşdirilib. 1999-cu il “Polis haqqında” Qanun qəbul edildi. Bununla da polis cəza verən orqan olmaqla yanaşı, xidmət edən quruma çevrildi. Bu illər ərzində elektron xidmətlər genişlənib, videomüşahidə sistemləri inkişaf etdirilib, kibercinayətkarlıqla mübarizə imkanları gücləndirilib. Bunların hamısı çox vacib və əhəmiyyətlidir. Ancaq ən mühüm nəticə vətəndaşa münasibətin dəyişməsidir. Təcrübə göstərir ki, bəzən vətəndaş üçün ən vacib məsələ təkcə hüquqi qərar deyil, onun dinlənilməsi, müraciətə obyektiv yanaşılması, qanunun ona izah edilməsidir. Fəaliyyətimiz dövründə bunu çoxlu nümunələrlə görmüşük. Həmişə demişəm ki, polisə hörmət təkcə onun səlahiyyətlərindən irəli gələn məsələ deyil, bu, ilk növbədə, onun peşəkarlığı, davranışı və ədalətli qərarları ilə qazanılır”, - deyə o diqqətə çatdırıb.
“Konstitusiya” Araşdırmalar Fondunun rəhbəri qeyd edib ki, bu gün təhlükəsizlik anlayışı əvvəlki illərlə müqayisədə tamamilə fərqlidir. Əgər əvvəllər cinayət əsasən fiziki məkanda törədilirsə, indi o, mühüm simsiz rəqəmsal mühitə keçib: “Kiberdələduzluq, bank kartlarındakı vəsaitlərin oğurlanması, saxta investisiya platformaları, süni intellekt, texnologiyadan istifadə etməklə bağlı müvafiq göstəricilər problemin miqyasını aydın göstərir. Burada təkcə cinayətkarın məsuliyyətə cəlb edilməsi məsələsi diqqət çəkmir. Qarşıdakı illərdə polisin əsas vəzifəsi yalnız yeni texnologiya əldə etmək deyil, həm də həmin texnologiyaları istifadə edə bilən peşəkar kadr potensialını qanun, ailə və insan hüquqlarına hörmət prinsipi ilə uzlaşdırmaqdır. Polisin ən böyük gücü xüsusi texnika və geniş səlahiyyətlər deyil, vətəndaşa olan etimadıdır. Bu etimad qorunduqca dövlət güclənəcək və qayda-qanun daha etibarlı təmin olunacaq. Hesab edirəm ki, son illərdə həyata keçirilən islahatların əsas məqsədi də budur”, - deyə o vurğulayıb.
Bölmənin digər xəbərləri
