Polşa qarşıdakı iki ildə Avropanın ən güclü quru qoşunlarını yaratmaq niyyətindədir
Vyana, 24 aprel, AZƏRTAC
Polşa qarşıdakı iki il ərzində öz ordusunun maddi-texniki bazasını və döyüş qabiliyyətini yüksəldərək, onu Avropanın ən güclü quru qoşunlarına çevirmək niyyətindədir.
AZƏRTAC xəbər verir ki, bu barədə Polşanın müdafiə naziri Mariuş Blaşak bildirib. Daha çox seçki vədi xarakteri daşıyan açıqlama Varşavadan 20 kilometr məsafədə yerləşən Volomin şəhərində seçicilərlə görüşdə səsləndirilib.
Nazir qeyd edib ki, bu planın həyata keçməsi üçün payızda parlament seçkilərində mühafizəkar Ədalət və Hüquq Partiyasının (PiS) qələbə qazanması vacibdir.
Polşada hakimiyyətdə olan PiS Ukraynanın müdafiəsinin tərəfdarı olan ən güclü siyasi qüvvələrdən biridir. Polşa hökuməti Ukraynadan qaçqın qəbul etmək, qonşu ölkəni tank, döyüş təyyarələri və digər silah-sursatla təmin etməklə yanaşı, öz ordusunu da məqsədyönlü şəkildə gücləndirir. Rusiya ilə müharibədə Ukraynaya sovet istehsalı olan silahları təhvil verən Polşa arsenalını NATO-dakı tərəfdaşlarının müasir silahları ilə gücləndirməyə çalışır.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
