Polşanın Adam Mitskeviç adına Poznan Universitetində “Azərbaycan Günü” adlı tədbir keçirilmişdir
Bakı, 3 iyun (AZƏRTAC). Polşanın Adam Mitskeviç adına Poznan Universitetində “Azərbaycan Günü” adlı tədbir keçirilmişdir.
AZƏRTAC xəbər verir ki, tədbirdə çıxış edən Azərbaycanın Polşadakı səfiri Həsən Həsənov ölkələrimiz arasında diplomatik əlaqələrin yaranma tarixindən danışmış, hər iki xalqın keçmişinin oxşar olduğunu qeyd etmişdir. Bildirmişdir ki, Azərbaycanda çoxsaylı milli azlıqların birgə yaşaması, müxtəlif dinlərin yanaşı mövcudluğu azərbaycanlıların tolerant xalq olmasına əyani sübutdur.
Səfir demişdir ki, Azərbaycan ərazisinin 20 faizi Ermənistan ordusu tərəfindən işğal edilmiş, bir milyondan çox azərbaycanlı doğma yurdlarından didərgin düşmüşdür.
Prezident İlham Əliyevin rəhbərliyi ilə aparılan uğurlu siyasət nəticəsində Azərbaycanın son 10 ildə əldə etdiyi nailiyyətlərə toxunan səfir vurğulamışdır ki, bu siyasət nəticəsində əhalinin sosial rifahı daha da yaxşılaşmışdır.
Sonra H.Həsənov tələbələrin suallarını cavablandırmışdır.
Daha sonra Azərbaycanın Polşadakı səfirliyi tərəfindən polyak dilində nəşr etdirilmiş 25 adda kitabın təqdimatı keçirilmişdir. Təqdimatdan sonra kitablar tələbələrə və universitet kitabxanasına hədiyyə edilmişdir.
Tədbirin sonunda Azərbaycan haqqında film nümayiş etdirilmiş, milli mətbəximizin təamlarından ibarət ziyafət verilmişdir.
Bölmənin digər xəbərləri
