Polşanın müxtəlif şəhərlərində keçirilən silsilə görüşlərdə Azərbaycan haqqında ətraflı məlumat verilmişdir
Bakı, 5 iyun (AZƏRTAC). 2014-cü ilin aprel-may aylarında Azərbaycanın Polşadakı səfirliyinin əməkdaşları - müşavir Ülvi Baxşəliyev, birinci katib Şahin Musayev, ikinci katib Xuraman Qasımova, üçüncü katib Samir Rzayev, referent Elnarə Məmmədova və Polşada fəaliyyət göstərən Azərbaycan Mədəniyyət Mərkəzi Cəmiyyətinin sədri Şəhla Kazımova Varşava, Serotsk, Nadajın və digər şəhərlərin ali və orta təhsil ocaqlarında silsilə görüşlər keçirmişlər.
Səfirlikdən AZƏRTAC-a bildirmişlər ki, görüşlərdə Azərbaycanın tarixi, dili, iqtisadi imkanları, zəngin mədəniyyəti, turizm potensialı, ictimai-siyasi həyatı, Ermənistan-Azərbaycan, Dağlıq Qarabağ münaqişəsi haqqında məlumat verilmişdir. Görüşlərin iştirakçılarına ölkəmizin turizm potensialını əks etdirən videoçarx göstərilmiş, onların sualları cavablandırılmışdır.
Görüşlər keçirilən zalda səfirliyin təşəbbüsü ilə polyak dilinə tərcümə olunaraq nəşr edilən, Azərbaycanın tarixini, mədəniyyətini, incəsənətini, qəhrəmanlıq eposlarını, milli mətbəxini, dilini, arxitekturasını, Azərbaycan-Polşa münasibətlərini əks etdirən 23 adda kitab iştirakçılara hədiyyə olaraq verilmişdir.
Bir çox şəhərlər, o cümlədən Radom şəhərində yayımlanan DAMİ, Qdanskda yayımlanan Nadmorska, Qnejno şəhərində yayımlanan Qnejno televiziya və radio kanallarında Azərbaycan haqqında müxtəlif mövzularda verilişlər efirə getmişdir.
Bölmənin digər xəbərləri
