PORTUQALİYANIN YENİ PREZİDENTİNİN SİYASİ PORTRETİ
66 yaşlı Silva klassik texnokratdır, ömrünü nəzəri və praktik iqtisadiyyata həsr etmişdir. O, Lissabon Texniki Universitetini bitirmiş, bundan sonra York Universitetində (Böyük Britaniya) staj keçmişdir.
Anibal Kavaku Silva siyasətə 1974-cü ilin aprel inqilabının qələbəsindən sonra gəlmiş, sonralar Sosial-Demokrat Partiyası (SDP) adlandırılan Xalq-Demokrat Partiyasına daxil olmuşdur.
İstedadlı iqtisadçının siyasi karyerası çox uğurlu olmuş, dəfələrlə SDP-nin siyahıları üzrə Respublika Məclisinə (birpalatalı parlamentə) seçilmiş, 1985-ci ildə isə bu partiyaya başçılıq etmişdir.
Anibal Kavaku Silva iqtisadiyyata dair nəzəri biliklərini maliyyə və planlaşdırma naziri, Milli Planlaşdırma Şurasının sədri və nəhayət, Portuqaliyanın Baş naziri (1985-1995-ci illər) vəzifələrində çox səmərəli şəkildə tətbiq etmişdir.
1996-cı ildə Anibal Kavaku Silva prezident vəzifəsi uğrunda mübarizəyə qoşulmuş, lakin Jorji Sampayyaya uduzmuşdur. On il sonra prezident seçkilərində yenidən öz namizədliyini irəli sürmüş və bu qərarı Portuqaliyanın son illərdə məruz qaldığı dərin sosial-iqtisadi böhrandan çıxarmaq əzmində olması ilə əsaslandırmışdır.
Bölmənin digər xəbərləri
