“Praktik peyk görüntülərinin emalı” kitabı ingilis dilində nəşr edilib
Bakı, 7 aprel, AZƏRTAC
AMEA akademik Həsən Əliyev adına Coğrafiya İnstitutunun direktoru, akademik Ramiz Məmmədov və Avstraliya alimi professor Əliəkbər Rəsulinin “Praktik peyk görüntülərinin emalı” kitabı ingilis dilində nəşr edilib.
İnstitutdan AZƏRTAC-a bildirilib ki, kitab Azərbaycanda şəkillərin klassik emalının bütün mərhələlərini əhatə edən ilk dərs ləvazimatıdır. Verilənlərin məsafədən zondlama üsulu ilə emalının əsasını təşkil edən prinsiplər dərslikdə sadə, anlaşıqlı və praktik təcrübi yolla oxuculara çatdırılır.
Coğrafiya, hidroiqlim, məsafədən zondlama, görüntü işləmə və CİS sahələrində geniş təcrübəsi olan iki alim tərəfindən yazılmış dərslik ERDAS IMAGINE proqram təminatında lazımi təcrübəni tez bir zamanda qazanmaq imkanını verir. Eyni zamanda, oxucuya kitabda verilən məlumatlardan asanlıqla kənara çıxaraq daha qabaqcıl bacarıqlara yiyələnmək üçün şərait yaradır.
Bu nəşr təkcə tələbələr üçün deyil, aspirantlar, tədqiqatçılar, müəllimlər, menecerlər, yer sistemləri və ətraf mühit məsələlərini öyrənən agentlik mütəxəssisləri üçün də faydalı bələdçi və məlumat kitabçasıdır.
Qeyd edək ki, kitab Avstraliyada da nəşr olunub.
Bölmənin digər xəbərləri
