Prezident İlham Əliyev: Azərbaycan neftçilərin zəhməti hesabına böyük iqtisadi potensial yarada bilib
Bakı, 8 noyabr, AZƏRTAC
Azərbaycan neftçiləri bütün dövrlərdə Azərbaycan xalqına xidmət ediblər. Müstəqillik dövründə onların zəhməti hesabına Azərbaycan böyük iqtisadi potensial yarada bilib. Neftçi Azərbaycanda çox şərəfli və hörmətli peşədir, həmişə belə olub, bu gün də belədir.
AZƏRTAC xəbər verir ki, Prezident İlham Əliyev bu fikirləri Azərbaycanda iki milyardıncı ton neft hasil olunması münasibətilə keçirilən təntənəli mərasimdə səsləndirib.
Dövlətimizin başçısı neftçilərinin ölkəmizin ümumi inkişafında rolunu çox yüksək qiymətləndərək xatırladıb ki, dünyada sənaye üsulu ilə ilk dəfə neft 1846-cı ildə Azərbaycanda çıxarılıb. O vaxt Azərbaycan dünya neftinin əsas hissəsini təmin edirdi. Tarixdə ilk dəfə olaraq XX əsrin ortalarında dənizdə də neft Azərbaycan neftçiləri tərəfindən çıxarılıb və bu da tarixi hadisədir.
“Azərbaycan neftçiləri sovet dövründə Xəzərin bütün neft-qaz yataqlarının aşkar olunmasında əsas rol oynamışlar, Rusiya Federasiyasında yeni neft yataqlarının kəşfində onların rolu çox böyükdür. Təsadüfi deyil ki, “İkinci Bakı”, “Üçüncü Bakı” adlandırılan yerlər var ki, bu yerlər Azərbaycan neftçilərinin adı ilə bağlıdır. Neftçilərimiz xarici ölkələrdə də işləyirdi, oraya ezam olunmuşdular. Əlbəttə ki, bu, Azərbaycanda neft sənayesində çalışan insanların peşəkarlığını, fədakarlığını göstərir”, - deyə Prezident İlham Əliyev vurğulayıb.
Bölmənin digər xəbərləri
