PREZİDENT İLHAM ƏLİYEV “N” HƏRBİ HİSSƏSİNDƏ YENİ KORPUSUN AÇILIŞINDA İŞTİRAK ETMİŞDİR
Naxçıvan qarnizonunun rəisi, general-leytenant Kərəm Mustafayev dövlətimizin başçısına raport verdi.
Prezident, Ali baş komandan İlham Əliyev əsgərləri salamladı.
Azərbaycan Respublikasının dövlət himni səsləndi.
Sonra Ali baş komandan döyüş bayraqlarını təqdim etdi, şəxsi heyəti bu əlamətdar hadisə münasibətilə təbrik etdi.
Mərasimi Naxçıvan MR Ali Məclisinin sədri Vasif Talıbov açdı.
NAXÇIVAN MR ALİ MƏCLİSİNİN SƏDRİ
VASİF TALIBOVUN ÇIXIŞI
-Möhtərəm cənab Prezident!
Hörmətli mərasim iştirakçıları!
Qədim Naxçıvan torpağı unudulmaz günlərini yaşayır. Muxtar respublika ərazisində yerləşən bu hərbi hissənin korpusu tikinti və yenidənqurma işlərindən sonra ölkəmizin rəhbəri, Ali baş komandan cənab İlham Əliyevin bilavasitə iştirakı ilə xidməti istifadəyə verilir. Ölkəmizə qarşı əsassız ərazi iddialarından əl çəkməyən azğın düşmənlə üz-üzə dayanan Azərbaycan ordusunun Naxçıvan Muxtar Respublikası ərazisindəki qoşun hissələrinin gücləndirilməsi, müdafiə potensialının artırılması, hərbi təmayüllü yeni obyektlərin istifadəyə verilməsi ümummilli liderimizin ordu quruculuğuna qayğısının ən mühüm göstəricisi və real təzahürüdür.
Azərbaycanın bütün tarix boyu yetişdirdiyi ən qüdrətli dövlət xadimi, ümummilli lideri, milli ordumuzun və dövlətimizin qurucusu möhtərəm Heydər Əliyevin əziz xatirəsini bir daha yad edirik. Hər bir dövlətin müstəqilliyinin vacib şərti onun ordusunun olmasıdır. Azərbaycan ordusu da, necə deyərlər, boş yerdən yaranmamışdır. Bu siyasət ötən əsrin 70-ci illərindən başlanmışdır. Həmin dövrdə Azərbaycanın digər respublikalarla birlikdə vahid siyasi məkana daxil olmasına baxmayaraq, möhtərəm Heydər Əliyev ölkəmizin gələcək müstəqilliyini nəzərdə tutaraq, uzun müddətə hesablanmış addımlar atır, milli hərbi kadrların yetişdirilməsinə diqqəti gücləndirirdi. O dövrdə bu cür siyasət yeritmək böyük qətiyyət və iradə tələb edirdi.
Bu, o dövr idi ki, keçmiş imperiya çar Rusiyasının siyasətini davam etdirərək, azərbaycanlı gəncləri hərb sənətinə yaxın buraxmırdı. Orduda hərbi xidmət keçən azərbaycanlıların tam əksəriyyəti müasir hərbi texnikadan kənarda saxlanılır, ən çox istehsal işlərinə, tikintiyə cəlb olunurdular. Bakının özündə fəaliyyət göstərən iki ali hərbi məktəbin qapıları da, əslində, azərbaycanlıların üzünə bağlı idi. Bütün bunlara baxmayaraq, xalqımızın böyük oğlunun vətənə, onun gələcəyinə bağlı siyasəti öz bəhrəsini verdi.
Möhtərəm Heydər Əliyev Cəmşid Naxçıvanski adına ixtisaslaşdırılmış məktəbi yaratdı. Bakıdakı ali hərbi məktəblərə qəbulda azərbaycanlı tələbələrin sayını artırdı. Keçmiş Sovetlər Birliyinin qabaqcıl ali hərbi məktəblərinə azərbaycanlı gəncləri təhsilə göndərdi. Məhz bu potensial hesabına 30 il sonra müstəqil Azərbaycan ordusunun zabit heyəti formalaşa bildi.
Bugünkü mərasimdə bir daha yada salmağın, xatırlatmağın yeridir ki, Azərbaycan müstəqillik qazandıqdan sonra da o vaxtkı siyasi rəhbərlərin naşılığı, ordu işini bilməməsi, bəzən də xalqın milli maraqlarına zidd mövqe tutması ucbatından ordu quruculuğuna lazımi diqqət yetirilmirdi. Ölkənin müharibəyə cəlb edilməsinə baxmayaraq, peşəkar ordu əvəzinə, siyasi partiyaların dəstələri yaradılırdı. O dövrdə Vətənin müdafiəsi əliyalın könüllülərin, polis dəstələrinin, avtovağzallardan, bazarlardan yığılıb heç bir hazırlıq keçmədən avtobuslarla birbaşa cəbhə bölgələrinə göndərilənlərin öhdəsinə buraxılmışdı.
Bunun əksinə olaraq, həmin dövrdə Naxçıvanda milli ordu quruculuğu istiqamətində əhəmiyyətli addımlar atan ümummilli liderimiz Ali Məclisin sədri seçiləndən dörd gün sonra, 1991-ci il sentyabrın 7-də Müdafiə Komitəsi yaratmaqla, müdafiəni mərkəzləşdirilmiş qaydada təşkilinin əsasını qoydu. İlk dəfə Naxçıvanda təşkil olunan sərhəd dəstəsinin və Azərbaycanın dövlət bayrağı böyük şəxsiyyətin iştirakı ilə qaldırıldı. Hərb tariximiz üçün bu da maraqlı faktdır ki, ilk dəfə hərbi parad 1992-ci il oktyabrın 19-da Naxçıvanda keçirildi.
Xalqımızın böyük oğlunun apardığı məqsədyönlü siyasət nəticəsində sovet qoşunları muxtar respublika ərazisini tərk edərkən, bütün əmlakı, texnikanı və döyüş sursatını burada saxlamış, bu potensialın sayəsində Naxçıvan Müdafiə Komitəsinin bazasında Azərbaycan ordusunun müvafiq strukturu yaradılmışdır. Həmin dövrdə motoatıcı briqada kimi fəaliyyətə başlayan hərbi hissə ümummilli liderimizin bilavasitə qayğısı nəticəsində milli ordu korpusu kimi fəaliyyət göstərir.
Qeyd olunanlar bir daha göstərir ki, Azərbaycan ordusunun bütün inkişaf mərhələləri, təşkilatlanması və bugünkü səviyyəyə gəlib çatması xalqımızın dahi rəhbərinin gərgin əməyinin nəticəsidir, bilavasitə onun adı ilə bağlıdır. Ümummilli liderimiz Naxçıvan Muxtar Respublikasına hər səfərində buradakı ordu hissələrində olur, müdafiənin təşkili ilə maraqlanır, öz tövsiyə və tapşırıqlarını verirdi. 2003-cü ildə muxtar respublikada yaradılmış “N” hərbi hissəsində olarkən möhtərəm Heydər Əliyev demişdir:
“Bizim buradakı hərbi hissələrimiz öz vəzifələrini bilirlər. Naxçıvan Muxtar Respublikasını hər an qorumağa qadirdirlər. Azərbaycanın ayrılmaz hissəsi olan Naxçıvan ərazimizin parçalanması nəticəsində ağır vəziyyətdə olduğu halda, buradakı ordu hissələrimiz yaxşı səviyyədədir. Ancaq mən onların qarşısında vəzifələr qoydum. Bu vəzifələri yerinə yetirmək üçün isə onlara yardım lazımdır”.
Cənab Prezident, ölkəmizin möhtərəm Heydər Əliyev tərəfindən müəyyənləşdirilmiş və hələ bundan sonra da uzun müddətə hesablanmış quruculuq siyasətinin davamçısı kimi Sizin böyük diqqət və qayğınız nəticəsində Naxçıvanda bu hərbi hissənin yenidən qurulması, Ali baş komandan olaraq, açılış mərasimində şəxsən iştirak etməyiniz bizə hədsiz sevinc gətirməklə yanaşı, məsuliyyətimizi də artırır. Əmin ola bilərsiniz ki, ordumuzun Naxçıvandakı hissələrində mənəvi əhval-ruhiyyə, Vətənə, Ali baş komandana sədaqət hissi, peşə və döyüş hazırlığı daim yüksələcəkdir.
Diqqətinizə görə sağ olun!
X X X
Azərbaycan Prezidenti, Ali baş komandan İlham Əliyev mərasimdə nitq söylədi.
Bölmənin digər xəbərləri
