PREZİDENT İLHAM ƏLİYEVİN NAZİRLƏR KABİNETİNİN İCLASINDA VERDİYİ TAPŞIRIQLAR AĞSULULAR ÜÇÜN KONKRET FƏALİYYƏT PROQRAMIDIR
AZƏRTAC-ın müxbiri xəbər verir ki, bu fikir aprelin 21-də Ağsu Rayon İcra Hakimiyyətində keçirilmiş, rayonda son üç ayda sosial-iqtisadi inkişafın yekunlarına və qarşıda duran vəzifələrə həsr edilmiş şura iclasında səsləndirilmişdir.
Rayon icra hakimiyyətinin başçısı Ənvər Seyidəliyev diqqəti 2008-ci ilin birinci rübündə Azərbaycanda sosial-iqtisadi sahədə qazanılan diqqətəlayiq nəticələrə, iqtisadi göstəricilər üzrə inkişaf dinamikasına cəlb etmişdir. Vurğulamışdır ki, ümummilli liderimiz tərəfindən təməli qoyulan və Prezident İlham Əliyevin bugünkü tarixi şəraitə uyğun olaraq yaradıcılıqla davam etdirdiyi məqsədyönlü və çevik sosial-iqtisadi islahatlar ölkəmizdə köklü dəyişikliklərə səbəb olmuş, Azərbaycanı regionun ən qüdrətli dövlətinə çevirmişdir.
İcra hakimiyyəti başçısının sosial-iqtisadi məsələlər üzrə müavini Rasim Novruzovun hesabat məruzəsi dinlənilmiş, çıxışlar olmuşdur.
Qeyd olunmuşdur ki, 2008-ci ilin birinci rübündə rayonda iqtisadiyyatın ayrı-ayrı sahələrində uğurlu nəticələr qazanılmış, genişmiqyaslı layihələrin həyata keçirilməsinə başlanmışdır. Tikinti-quruculuq və abadlıq işləri xüsusilə böyük vüsət almışdır. 4 saylı Ərazi Vergilər İdarəsi üçün kompyuter terminalı istifadəyə verilmiş, çörək, tamet və bardur istehsalı sexləri tikilib istismara buraxılmışdır. 25 hektarda yeni üzüm plantasiyaları, 500 hektarda nar bağı salınmışdır. Ağsuçayda 406 kubmetr həcmində sahilbərkitmə işləri aparılmışdır. Ağsu şəhərində Heydər Əliyev muzeyinin, ümummilli liderimizin adına seyrəngahın, avtovağzal kompleksinin, “Qəhrəmanlar parkı”nın, Cəlayir kəndində 220 yerlik orta, Xəlilli kəndində isə 180 yerlik əsas məktəblərin inşasına başlanmışdır. Şəhər əhalisinin içməli su təchizatının yaxşılaşdırılması üçün 2580 metrlik magistral boru kəmərinin, 3900 metrlik orta təzyiqli qaz kəmərinin çəkilişinə başlanmış və bu işlər sürətlə davam etdirilir.
İclasda taxılçılıq, heyvandarlıq, üzümçülük sahələrinin daha sürətlə inkişaf etdirilməsi məqsədi ilə görülmüş işlərdən, bununla əlaqədar sahibkarlara göstərilən diqqət və qayğıdan ətraflı bəhs edilmiş, ayrı-ayrı xidmət təşkilatlarının fəaliyyəti təhlil olunmuş, yol verilmiş nöqsanlar və onların aradan qaldırılması məsələlərindən danışılmış, konkret vəzifələr müəyyənləşdirilmişdir.
Çıxışlarda qeyd olunmuşdur ki, Prezident İlham Əliyevin Nazirlər Kabinetinin iclasında verdiyi tapşırıqlar ağsulular üçün konkret fəaliyyət proqramıdır.
Şura iclasında Milli Məclisin deputatı Ərəstun Cavadov çıxış edərək diqqəti bir daha Prezident İlham Əliyevin Nazirlər Kabinetinin yığıncağındakı nitqindən irəli gələn müddəlara yönəltmiş, bu sahədə qarşıda duran təxirəsalınmaz vəzifələrdən danışmışdır.
Yığıncaq iştirtakçıları adından Prezident İlham Əliyevə müraciət qəbul olunmuşdur.
Bölmənin digər xəbərləri
