Prezidentin Şuşa Forumunda səsləndirdiyi mesajlar Azərbaycanın gələcək inkişaf strategiyasının yol xəritəsidir RƏY
Bakı, 14 iyul, AZƏRTAC
Prezident İlham Əliyevin IV Şuşa Qlobal Media Forumunda səsləndirdiyi fikirlər Azərbaycanın xarici siyasəti, beynəlxalq münasibətləri, enerji təhlükəsizliyi, nəqliyyat-kommunikasiya layihələri və qlobal geosiyasi proseslərdə oynadığı rol baxımından mühüm strateji mesajlar idi. Dövlət başçısının çıxışı, əslində, Azərbaycanın yaxın perspektiv üçün inkişaf strategiyasının əsas istiqamətlərini və ölkənin gələcək yol xəritəsini ortaya qoydu.
Bu fikirləri AZƏRTAC-a açıqlamasında Milli Məclisin deputatı Tural Gəncəliyev deyib.
Deputat bildirib ki, Prezident İlham Əliyevin çıxışından bir daha aydın oldu ki, Azərbaycan beynəlxalq münasibətlər sistemində orta güc kimi formalaşan mövqeyini bundan sonra da möhkəmləndirəcək. "Prezident İlham Əliyevin çıxışında bir daha şahidi olduq ki, Azərbaycan nəqliyyat-kommunikasiya xətlərinin inkişafı, enerji təhlükəsizliyinin təmin edilməsi, Avropa İttifaqı, region dövlətləri və bütövlükdə Böyük Avrasiya məkanında həyata keçirdiyi siyasətlə Cənubi Qafqazın və Xəzər hövzəsinin əsas aktorlarından biri kimi fəaliyyətini davam etdirəcək. Bu gün ölkəmiz təkcə regionun deyil, daha geniş coğrafiyanın geosiyasi və geoiqtisadi proseslərinə təsir göstərən mühüm tərəfdaş kimi çıxış edir. Prezident İlham Əliyevin çıxışında xüsusi diqqət çəkən məqamlardan biri mürəkkəb beynəlxalq şəraitdə milli birliyin, xalqla dövlət arasında həmrəyliyin və müstəqil, suveren siyasətin qorunmasının vacibliyi idi. Prezident milli birlik ideyasını Azərbaycanın dayandığı əsas dəyərlərdən biri kimi xüsusi vurğuladı. Bu da onu göstərir ki, Azərbaycanın orta güc kimi formalaşmasının başlıca şərtlərindən biri məhz xalqımızın milli birlik ətrafında birləşməsi, dövlətin həyata keçirdiyi siyasətə dəstək verməsi və milli maraqların qorunmasıdır. Milli təhlükəsizlik strategiyamızın əsas dayaqlarından biri də məhz bu dəyərlərin qorunmasıdır", - deyə deputat bildirib.
Tural Gəncəliyev qeyd edib ki, Azərbaycan milli maraqlara əsaslanan müstəqil siyasəti nəticəsində bu gün Orta Dəhlizin əsas iştirakçılarından birinə çevrilib. “Azərbaycan nəqliyyat-kommunikasiya marşrutlarının üzərində yerləşən, Avropa ilə Asiyanı birləşdirən mühüm ölkə kimi çıxış edir. Eyni zamanda, ölkəmiz dünya enerji təhlükəsizliyinə mühüm töhfələr verən etibarlı tərəfdaşdır. Azərbaycan bu gün Çindən, Cənub-Şərqi Asiyadan Avropaya qədər uzanan geniş coğrafiyada sabitlik adası və təhlükəsiz tranzit marşrutu kimi qəbul olunur. Prezident İlham Əliyevin Çinlə strateji tərəfdaşlığa dair səsləndirdiyi fikirlər də bu baxımdan xüsusi əhəmiyyət daşıyır. Dövlətimizin başçısı qeyd etdi ki, Çindən Avropaya və əks istiqamətdə daşınan yüklər Azərbaycanın təqdim etdiyi təhlükəsiz və etibarlı nəqliyyat infrastrukturu vasitəsilə maneəsiz şəkildə çatdırıla bilər. Bu isə Azərbaycanın Orta Dəhlizdə oynadığı rolun daha da artdığını göstərir”, - deyə Tural Gəncəliyev bildirib.
Deputat qeyd edib ki, Prezident İlham Əliyevin Forum çərçivəsində səsləndirdiyi fikirlər Slovakiya Prezidentinin Azərbaycana səfəri zamanı verdiyi mesajlarla da üst-üstə düşür. "Bu, bir daha göstərir ki, Avropa İttifaqı ölkələri Azərbaycanı Böyük Avrasiya məkanına açılan mühüm qapı kimi qiymətləndirirlər. Geosiyasi nəzəriyyələrdə Avrasiyanın əhəmiyyətinə dair mövcud yanaşmalar fonunda Azərbaycanın strateji mövqeyi daha da ön plana çıxır. Bu gün Avropa dövlətləri Mərkəzi Asiyaya, Xəzər hövzəsinə və daha geniş Avrasiya regionuna çıxış üçün ən etibarlı marşrut kimi məhz Azərbaycanı görürlər. Azərbaycan artıq təkcə enerji resursları ilə deyil, həm də alternativ enerji layihələri, təhlükəsiz nəqliyyat dəhlizləri və beynəlxalq platformalarda fəal fəaliyyəti ilə qlobal gündəliyin formalaşmasına töhfə verir.
Azərbaycan bu gün beynəlxalq təşkilatlara uğurla sədrlik etmiş, etibarlı tərəfdaş kimi özünü təsdiqləmiş və orta güc statusunu möhkəmləndirmiş dövlətdir. Prezident İlham Əliyevin Şuşa Forumunda məhz bu məsələyə xüsusi diqqət yetirməsi təsadüfi deyil. Bu, Azərbaycanın artıq qlobal siyasətin formalaşmasına təsir göstərən dövlətlər sırasında yer aldığını göstərir. Azərbaycan ərazi və əhali baxımından böyük dövlətlərlə müqayisə olunmasa da, geosiyasi çəkisi və strateji əhəmiyyəti ilə fərqlənir. Azərbaycanın Avropa İttifaqına üzv olan çoxsaylı dövlətlərlə strateji tərəfdaşlıq münasibətlərinə malik olması, 10 Avropa İttifaqı ölkəsi də daxil olmaqla çoxsaylı dövlətin enerji təhlükəsizliyinə töhfə verməsi, Avropanın Mərkəzi Asiyaya çıxışı üçün əsas marşrut kimi qiymətləndirilməsi ölkəmizin artıq orta güc kimi formalaşdığını təsdiqləyir", – deyə Tural Gəncəliyev vurğulayıb.
Deputat sonda bildirib ki, Prezident İlham Əliyevin IV Şuşa Qlobal Media Forumunda dünyanın aparıcı media qurumlarının nümayəndələri ilə açıq dialoq aparması, bütün sualları səmimi və əsaslandırılmış şəkildə cavablandırması Azərbaycanın mövqeyinin yüz milyonlarla auditoriyaya çatdırılması baxımından mühüm əhəmiyyət daşıyır. Bu forum bir daha nümayiş etdirdi ki, Azərbaycan artıq təkcə regional deyil, həm də qlobal informasiya və geosiyasi gündəliyin formalaşmasına təsir göstərən orta güc statusunu uğurla möhkəmləndirən dövlətdir.
Müxbir - Səbinə Əlizadə
Bölmənin digər xəbərləri
