“PROFESSOR ƏZİZ ƏLİYEV” TANKERİNİN İSTİSMARA VERİLMƏSİ VƏ YAXT-KLUBUN TƏNTƏNƏLİ AÇILIŞ MƏRASİMİ
Azərbaycanın Baş naziri İlham Əliyev mərasimdə iştirak etmişdir.
Baş nazir Gəmiçiliyin əməkdaşlarını, mərasimdə iştirak edən dövlət və hökumət nümayəndələrini səmimiyyətlə salamladı, xarici qonaqlarla görüşdü. O, tankerin istismara verilməsini və Yaxt-klubun rəsmi açılışını bildirən qırmızı lenti kəsdi və uğurlar arzuladı.
Kapitan Faiq Xəlilov “Professor Əziz Əliyev” adına tankerin hazırlıq vəziyyəti barədə raport verdikdən sonra Baş nazir gəmi ilə yaxından tanış oldu. Məlumat verildi ki, avqustun 18-də Rusiyanın Nijni Novqorod şəhərindəki “Krasnoye Sormovo” zavodunda “Professor Əziz Əliyev” tankerində Azərbaycanın dövlət bayrağı təntənəli şəkildə qaldırılmışdır. Tanker Xəzər Dəniz Gəmiçiliyinin “Krasnoye Sormovo” zavodu ilə bağladığı müqaviləyə əsasən inşa olunmuşdur. Bu, Gəmiçiliyin sifariş etdiyi 4 gəmidən birincisidir. 8 min ton neft və neft məhsulları daşımaq gücünə malik olan, ən müasir texniki avadanlıqla təchiz olunmuş tankerin uzunluğu 141, eni isə 16,9 metrdir. Əsas sistemləri İngiltərədə istehal olunmuşdur və gəmi kompüter sistemi ilə idarə edilir.
Baş nazir İlham Əliyev fəxri qonaqlar kitabına ürək sözlərini yazdı və tankerin istismara başlamasını bildirən düyməni basdı.
Kapitan Faiq Xəlilov xatirə olaraq “Professor Əziz Əliyev” tankerinin maketini Baş nazirə təqdim etdi.
Sonra Baş nazir İlham Əliyev Yaxt-kluba gələrək, burada idmançılar üçün yaradılmış şəraitlə yaxından tanış oldu, ayrı-ayrı otaqlara baxdı.
Sonra Yaxt-klubun iclas salonunda təntənəli açılış mərasimi oldu.
Azərbaycanın dövlət himni əzəmətlə səsləndi.
Mərasimi Xəzər Dəniz Gəmiçiliyinin rəisi Aydın Bəşirov açaraq dedi ki, Prezidentimiz Heydər Əliyevin Gəmiçiliyin kollektivinə bəslədiyi xüsusi münasibət hər bir dənizçiyə yaxşı məlumdur. Onlar bu diqqət və qayğını gündəlik işlərində daim hiss edir və yüksək etimadı öz fədakar əməkləri ilə doğrultmağa çalışırlar.
Azərbaycanın Xəzərdəki mövqeyini zəiflətmək üçün 1990-cı illərin əvvəllərində müəyyən qüvvələrin təsiri ilə Gəmiçiliyi parçalamağa cəhdlər göstərilsə də, o zaman məhz cənab Heydər Əliyevin qətiyyəti respublika üçün strateji əhəmiyyəti olan dəniz nəqliyyatını qoruyub saxlamağa imkan verdi. Daha sonra Prezidentimizin köməyi ilə dəniz nəqliyyatının inkişafına təkan verən bir çox ciddi addımlar atıldı. Onların nəticəsidir ki, biz nəinki milli nəqliyyat donanmamızı qoruyub saxlamağa, hətta, onu planlı şəkildə yeniləşdirməyə nail olmuşuq.
A.Bəşirov bildirdi ki, keçən il quru yük daşıyan “Maestro Niyazi” gəmisini almışıq. “Professor Əziz Əliyev” gəmisi də Gəmiçiliyin, “Krasnoye Sormovo” zavodu ilə bağladığı müqaviləyə əsasən, öz vəsaiti hesabına inşa etdirdiyi 4 tankerdən birincisidir.
Gəmiçiliyin rəisi Yaxt-klubun da qısa bir vaxt ərzində özlərinin vəsaiti və qüvvəsi ilə tikildiyini, Milli Parkımızın yaraşığına çevrilən bu obyektdə Prezident Heydər Əliyevin köməyi sayəsində açılışı mümkün olmuş Azərbaycan Dövlət Dəniz Akademiyası müdavimlərinin məşqlər keçdiyini, keçən ilin oktyabr ayında Həştərxanda yarışlarda onların ikinci yer tutduğunu vurğuladı.
A.Bəşirov mərasim iştirakçılarını təbrik etdi, Baş nazir İlham Əliyevə və qonaqlara, Əziz Əliyevin ailə üzvlərinə minnətdarlığını bildirdi.
Sonra çıxış edən Nijni Novqorodun “Krasnoye Sormovo” zavodunun direktoru Nikolay Jarkov başçılıq etdiyi kollektivin Azərbaycanla əməkdaşlığının tarixindən, müasir dövrdə bu əməkdaşlığın konkret nəticələrindən danışdı, indi istismara verilən tankerin texniki imkanlarının Avropa standartlarına uyğun olduğunu söylədi.
İkinci tankerin hazırda sınaqdan çıxarıldığını, oktyabrın əvvəllərində Bakıda olacağını vurğulayan qonaq dedi ki, biz 1990-cı illərə qədər əslində, yalnız sualtı atom və dizel qayıqları inşa edirdik. Bunların inşası məsələsinə Siyasi Büroda daim baxırdılar. Siyasi Büroda Heydər Əliyeviç Əliyev tərəfindən həmişə çox böyük dəstək olurdu. O, sualtı atom qayığı inşa etməyin nə demək olduğunu yaxşı bilirdi və biz onun dəstəyini həmişə hiss edirdik. Odur ki, indi biz Heydər Əliyeviç Əliyevə ürəkdən cansağlığı diləyirik. Arzu edirik ki, ölkənizdə hər şey yaxşı və daim əmin-amanlıq olsun. Biz bu ümidlə yaşayırıq ki, münasibətlərimiz daha da yaxşılaşacaq, möhkəmlənəcəkdir. Prezidentlərimiz Vladimir Vladimiroviç Putin ilə Heydər Əliyeviç Əliyev arasındakı dostluq onun rəhnidir ki, ölkələrimizin iqtisadiyyatı inkişaf edəcək, xalqlarımızın rifahı yüksələcəkdir. Zənnimcə, Sovet İttifaqının süqutundan sonra, hamımızın vəziyyətinin yaxşı olmadığı vaxtlarda düzgün xətt götürüldü və buna görə də biz əməkdaşlığımızın inkişafı üçün bir-birimizə çox kömək və etibar etməliyik.
Xəzər Dəniz Gəmiçiliyi istismar idarəsinin işçisi Sakit Məlikov, əməkdar idman ustası, boksçu Rövşən Hüseynov mərasimdə çıxış edərək, Gəmiçiliyin kollektivindən 4 nəfərin “Şöhrət” ordeninə, 14 nəfərin isə “Tərəqqi” medalına layiq görülməsini dövlətin dənizçilərə böyük qayğısı kimi qiymətləndirdilər. Onlar bildirdilər ki, Azərbaycan məhz Prezident Heydər Əliyevin fəaliyyəti sayəsində beynəlxalq aləmdə tanınmış, dünya birliyində özünəməxsus yer tutmuşdur. Görülən işlər xalqımızın sabaha inamını möhkəmlətməklə yanaşı, gələcək uğurların da bünövrəsini qoyur.
Natiqlər dedilər ki, çox qısa bir zamanda respublikamızda idmanın hərtərəfli inkişaf etməsi hamını sevindirir. İdmançılarımızın müxtəlif beynəlxalq yarışlarda, olimpiya oyunlarında, dünya və Avropa çempionatlarında uğurlu çıxışları, qazandıqları qələbələr və hər bir qələbədən sonra müstəqil respublikamızın üçrəngli bayrağının qaldırılmasından, dövlət himnimizin səsləndirilməsindən xalqımızın keçirdiyi fərəh hissi – bütün bunlar İlham Əliyevin rəhbərliyi ilə Milli Olimpiya Komitəsinin gərgin fəaliyyətinin nəticəsidir.
Çıxış edənlər son illərdə Azərbaycanda beynəlxalq yarışların keçirilməsindən, respublikamızda olimpiya hərəkatının inkişafından, gənc nəslin sağlam böyüməsinə göstərilən qayğıdan da söhbət açdılar.
Akademik Cəmil Əliyev tarixdə yaxşı ad qoyub getmiş atasının xatirəsinin əbədiləşdirildiyi üçün Azərbaycan dövlətinə, hökumətinə Əziz Əliyevin ailəsi adından dərin minnətdarlığını bildirdi.
Baş nazir İlham Əliyev mərasimdə çıxış etdi.
Bölmənin digər xəbərləri
