Bakı, 11 oktyabr, AZƏRTAC

Azərbaycan Prezidenti, Müzəffər Ali Baş Komandan İlham Əliyevin azad edilmiş Cəbrayıla səfəri, rayon ictimaiyyətinin nümayəndələri ilə görüşü ölkəmizdə geniş əks-səda doğurub. Cəbrayıl şəhərinin təməlqoyma mərasimi tarixi hadisə kimi dəyərləndirilir. Görüş iştirakçılarının biri - Azərbaycan Texniki Universitetinin professoru, Əməkdar elm xadimi Həsən Hüseynov səfər təəssüratlarını, son 28 ildə Azərbaycanda və Qarabağ münaqişəsi ətrafında baş verən hadisələrlə bağlı düşüncələrini AZƏRTAC-ın oxucuları ilə bölüşür.

Cəbrayılın düşmən əsarətindən azad olunmasının birinci ildönümü münasibətilə 28 illik həsrətdən sonra vətənə səfər etdik. Azərbaycan Prezidenti, Müzəffər Ali Baş Komandan İlham Əliyev Cəbrayıl şəhərinin bərpasına start verdi, rayon iqtisadiyyatının və sosial infrastrukturun yenidən qurulmasına hədəflənmiş çox zəngin proqram üzrə strateji obyektlərin təməlini qoydu: Şərqi Zəngəzur iqtisadi rayonunda yaradılacaq “Araz Vadisi İqtisadi Zonası” Sənaye Parkı; “KamAZ” ASC ilə “Gəncə Avtomobil Zavodu” İstehsalat Birliyinin birgə servis mərkəzi; Cəbrayıl Rayon Mərkəzi Xəstəxanası; Akademik Mehdi Mehdizadə adına tam orta məktəbin binası və ilk çoxmənzilli yaşayış məhəlləsi. Prezident səfər zamanı, həmçinin Dövlət Sərhəd Xidmətinin hərbi hissə kompleksinin və 110/35/10 kilovoltluq “Cəbrayıl” yarımstansiyasının açılışlarını etdi. Bütün bunlar azad olunmuş torpaqlarda həyata keçirilən quruculuq işlərinin miqyasının nə qədər geniş olduğu barədə tam təsəvvür yaradır.

Kortejimiz yeni inşa edilən, hər tərəfində onlarla müasir tikinti texnikası işləyən altı xətli Şükürbəyli-Cəbrayıl yolu ilə irəliləyirdi. İstər-istəməz xəyal insanı 1993-cü ilin avqustuna aparırdı. O vaxt bu yollar var-yoxunu, ev-eşiyini, doğmalarının məzarlarını qoyub öz ölkəsində məcburi köçkünə çevrilmiş ümidsiz insan karvanları ilə dolu idi.

SSRİ-nin çökməsi nəticəsində yenicə müstəqillik qazanmış Azərbaycan dəhşətli bir geosiyasi oyunların poliqonuna çevrilmişdi. Postsovet ölkələrinin mərkəzdənqaçma qüvvələrini neytrallaşdırmaq üçün hədəflənmiş bu siyasət bir çox yerlərdə, o cümlədən Qarabağda münaqişə ocaqları alovlanmağa başlamışdı. Azərbaycanda bu məkrli plan Ermənistan kimi xəstə təxəyyüllü, cılız düşüncəli, gözünü qonşularının torpaqlarına tikmiş separatizmi dəstəkləyən dövlətlər tərəfindən həyata keçirilirdi.

Keçmişdən miras qalmış determinist qanunlarla idarə olunan qeyri-effektiv planlı iqtisadiyyata, 20 faiz işğal altında olan əraziyə, bir milyondan çox qaçqın və məcburi köçkünə, qeyri-nizami əliyalın orduya, yalnız kasad ehtiyaclara hədəflənmiş dövlət büdcəsinə, xüsusi xidmət orqanlarının poliqonuna çevrilmiş əraziyə malik Azərbaycanın belə bir mürəkkəb geosiyasi oyundakı maraqlarını bütün xalqı vahid ideologiya ətrafında birləşdirə bilən, dünya tərəfindən qəbul edilən, xarizmatik və təcrübəli bir lider müdafiə edə bilərdi.

Əsilli-nəcabətli xalq ən çətin anlarda öz tarixi qəhrəmanını yetişdirməlidir. Elə bir xarizmatik qəhrəman ki, ölkəni vahid ideologiya ətrafında birləşdirə bilsin, güclü iqtisadiyyat, nizami ordu, müdafiə sənayesi kompleksi yarada bilsin, müasir hərbi biliklərə malik zabit korpusu yetişdirsin, ölkəni texnoloji cəhətdən inkişaf etdirsin, elmə, təhsilə xüsusi diqqət ayırsın, güclü diaspor formalaşdırsın. Yaranmış vəziyyət diplomatik əlaqələr qurulmasını, əsl həqiqətləri bəyan etmək üçün dünyanın aparıcı təşkilatlarında - Birləşmiş Millətlər Təşkilatı, Qoşulmama Hərəkatı, İslam Əməkdaşlıq Təşkilatı və digər beynəlxalq qurumlarda kürsülərə malik olmasını tələb edirdi. Ölkənin müstəqilliyini qorumaq üçün mövcud oyunçular arasında balanslı siyasət aparılması vacib idi. O vaxt xalqımıza belə bir lider hava və su kimi lazım idi.

Ruspərəst-kosmopolit liderləri, qeyri-peşəkar millətçi liderlər əvəz etdi. Ölkə çalxalanırdı, vətəndaş müharibəsi ilə üz-üzə qalmışdı. Belə bir ağır vəziyyətdə özündə güc tapan xalqımız çağdaş dünya tərəfindən qəbul olunan, yüksək xarizmə və təcrübəyə malik, Azərbaycanın potensial imkanlarını reallaşdırmağa və ölkə həqiqətlərini tanıtmağa qadir Ümummilli liderini - Heydər Əliyevi prezident seçdi.

Ölkənin intibah dövrü başlandı, xalq azərbaycançılıq ideologiyası ətrafında konsolidasiya olundu, əsrin müqaviləsi, milyardlarla investisiyalar, yeni texnologiyaların transferi Azərbaycanın siyasi-iqtisadi palitrasını dəyişdi. Yeni iqtisadi layihələr yeni tərəfdaşlar cəlb etdi, münaqişə ətrafında hüquqi baza yaradıldı, nizami ordu quruculuğuna, peşəkar zabit korpusu hazırlığına başlanıldı. Ölkə sistemli və intensiv inkişaf yoluna qədəm qoydu.

Azərbaycan, həmçinin həyati əhəmiyyət daşıyan digər vacib bir məsələni, əldə edilmiş müvəffəqiyyətlərin dayanaqlı və davamlı inkişafını təmin edə biləcək yeni liderin seçilməsi məsələsini dünyanı heyrətə gətirə biləcək yüksək müdrikliklə həll etdi. Ölkə keyfiyyətcə yeni

inkişaf mərhələsinə daxil oldu. Dünyanın ən məşhur diplomatiya mərkəzlərindən birinin məzunu, Heydər Əliyev məktəbinin yetişdirməsi və davamçısı, Avropanın aparıcı dillərini dərindən bilən və ən nəhayət böyük vətənpərvər İlham Əliyev prezident seçildi. Sənaye inqilabı başlandı, iqtisadiyyatın diversifikasiyası həyata keçirildi, qeyri-neft sektoru inkişaf etdirildi, güclü infrastruktur quruldu. İstehsal olunan neft-qaz məhsullarını xarici bazarlara çıxarmaq üçün tərkibinə transmilli korporasiyalar daxil olan konsorsiumlar, logistik sistemlər yaradıldı, Avropanın enerji təhlükəsizliyini təmin edə biləcək neft-qaz kəmərləri, dəmir yol şəbəkələri çəkildi. Bir sıra mühüm islahatlara start verildi.

Azərbaycanın iqtisadi qüdrəti artdıqca onun həqiqətləri çağdaş dünya tərəfindən daha adekvat qəbul edilməyə başlandı. Ölkəmizin iqtisadi tərəfdaşları onun ədalətli siyasi mövqeyinin müdafiəçilərinə çevrildilər. Türkiyə-Azərbaycan əlaqələri “Bir millət iki dövlət” devizi altında güclü inkişaf edərək strateji müttəfiqliyə çevrildi. Qardaş Pakistanla, Qoşulmama Hərəkatı və İslam Əməkdaşlıq Təşkilatı ilə daha sıx əməkdaşlıq Azərbaycan ətrafında güclü və etibarlı təhlükəsizlik qurşağı formalaşdırdı. İqtisadi, siyasi, sosial sahələrdə məntiqi ardıcıllıqla atılan hər bir addım Azərbaycanı ərazi bütövlüyünün təmin olunmasına daha da yaxınlaşdırırdı.

Bu gün azərbaycançılıq ideologiyası ətrafında sıx birləşmiş xalqı, yüksək dəqiqlikli müasir silahlarla silahlanmış, ən modern hərbi texnologiyaların daşıyıcısı olan vətənpərvər orduya, mükəmməl diplomatiyaya, bilik bazasına, sistemli fəaliyyətə, dəmir məntiqə və siyasi iradəyə malik, xalqı iqtidarlı-müxalifətli yumruq kimi öz ətrafında birləşdirmiş Müzəffər Ali Baş Komandanı, şəfqətli, qayğıkeş və humanist birinci Vitse-prezidenti olan Azərbaycan öz torpaqlarını azad edilməsinin vaxtı çatdığını dünyaya bəyan etdi.

Azərbaycan Ordusunun tətbiq etdiyi taktiki və strateji innovasiyalar dünyanın aparıcı hərbi mərkəzlərinin təhlil obyektinə çevrildi. Möhtərəm Prezidentimizin dünyanın aparıcı kütləvi informasiya vasitələrinə çoxsaylı müsahibələri, o cümlədən tarixi gerçəkliklərə, təkzibolunmaz arqumentlərə və beynəlxalq hüququn norma və prinsiplərinə söykənən məntiqi və dəqiq cavabları informasiya müharibəsində də Azərbaycanın qələbəsini təmin etdi. Dost və qardaş Türkiyənin bütün dünyaya bəyan etdiyi Azərbaycana təmənnasız dəstəyi anti-azərbaycan qüvvələrini neytrallaşdırdı. Azərbaycan Ordusu və xalqı düşmən təxribatlarına cavab olaraq torpaqlarının azad edilməsi uğrunda müqəddəs Vətən müharibəsinə qalxdı. Minsk qrupunun 30 illik fəaliyyətinin səmərəsizliyi Azərbaycana BMT-nin Təhlükəsizlik Şurasının Ermənistan qoşunlarının Azərbaycan ərazilərini dərhal və şərtsiz azad etməsi barəsində 4 qətnaməsini müvəffəqiyyətlə icra etməyə əsas verdi. Hər bir azərbaycanlıya hakim kəsilmiş natamamlıq -köçkünlük kompleksi döyüşkən xalqı, rəşadətli ordusu, şəhidləri və Ali Baş Komandanı sayəsində qürur və başucalığı kimi ali hisslərlə əvəz olundu.

Cəmi bir həftə müddəti ərzində Cəbrayıl şəhəri düşmən işğalından azad edildi. Xudafərində Azərbaycan bayrağı dalğalandı. Ordumuzun Xocavənd rayonunun cənub kəndləri və strateji Hadrut qəsəbəsi istiqamətində hərbi əməliyyatlar keçirməsi üçün geniş imkanlar yarandı. Dəmir yumruq düşmənin 27 ildə yaratdığı istehkamları, super güclərin ona hədiyyə etdiyi müasir zirehli texnikanı 44 gün müddətində darmadağın edərək işğalçı ölkəni kapitulyasiya aktına imza atmağa məcbur etdi.

Budur reallıq, Azərbaycan xalqının dünyanı heyrətə gətirən həqiqətləri. Biz artıq Cəbrayıldayıq, Müzəffər Ali Baş Komandanın metaforaya çevrilmiş kəlamları ilə desək, əziz Cəbrayıl, biz qayıtmışıq, biz səninləyik, biz səni dirçəldəcəyik, erməni vandalizminin təzahürü olan bu xarabazarlıqları, dağıdılmış şəhər və kəndləri XXI əsrin ən qabaqcıl çağırışlarına cavab verən ekoloji təmiz texnologiyalarla yaşıl enerji, yaşıl şəhər, yaşıl kənd texnologiyaları ilə gülüstana çevirəcəyik və bir daha ucadan deyəcəyik: Qarabağ bizimdir! Qarabağ Azərbaycandır!