QAFQAZ MÜSƏLMANLARI İDARƏSİNİN SƏDRİ MOLDOVA SƏFİRİ İLƏ GÖRÜŞMÜŞDÜR
Şeyxülislam qonağı səmimi salamlayaraq, ölkəmizdə dini vəziyyət barədə qısa məlumat vermişdir. O bildirmişdir ki, Azərbaycan daim dini dözümlülüyü ilə fərqlənmişdir, burada üç əsas din – müsəlman, yəhudi və xristian dinləri dinc yanaşı mövcuddurlar.
A.Paşazadə Azərbaycan torpaqlarının 20 faizinin işğal altında olduğunu nəzərə çarpdıraraq demişdir ki, Moldova kimi, ölkəmiz də öz ərazi bütövlüyü problemini həll edir. O əmin olduğunu bildirmişdir ki, Azərbaycan rəhbərliyinin səyləri nəticəsində Ermənistan-Azərbaycan, Dağlıq Qarabağ münaqişəsi sülh yolu ilə həll olunacaqdır.
İon Robu Moldovada Dnestryanı münaqişənin tarixi barədə ətraflı məlumat verərək bildirmişdir ki, beynəlxalq hüquq baxımından bu problem etnik köklərə malik deyildir və siyasi saxtakarlıqdır.
İ.Robu demişdir ki, Moldovada çoxüzvlü Azərbaycan diasporu var və o, ölkənin siyasi və iqtisadi həyatında fəal iştirak edir. Ölkələrimiz arasında iqtisadi əməkdaşlığa toxunan İ.Robu vurğulamışdır ki, bu yaxınlarda Azərbaycanın sərmayəsi ilə neft terminalı tikilmişdir. Hazırda Kişinyovda məscidin inşası məsələsi nəzərdən keçirilir.
Bölmənin digər xəbərləri
