QAFQAZ MÜSƏLMANLARI İDARƏSİNİN SƏDRİ ŞEYXÜLİSLAM HACI ALLAHŞÜKÜR PAŞAZADƏNİN ÇIXIŞI
- Bismillahir- rəhmanir-rəhim!
Zati-aliləri, cənab Prezident həzrətləri!
Yepiskop həzrətləri, hörmətli qonaqlar!
Həqiqətən də bu gün bizim üçün çox şərəfli gündür. Ona görə şərəflidir ki, bir daha dünyaya göstəririk ki, Azərbaycanda yaşayan bütün millətlər əqidəsindən, dinindən asılı olmayaraq, vicdan azadlığından istifadə edə bilirlər. Bu da təsadüfi deyildir. Bu kilsənin vaxtilə bünövrəsini qoyan Zeynalabdin Tağıyev, bu gün isə onu ikinci dəfə həyata qaytaran Aydın Qurbanovdur. Mən deyərdim ki, bu, nadir bir hadisədir. Belə bir iş başqa dövlətlərdə yoxdur. Azərbaycanlı, müsəlman belə bir kilsəni təmir edib və bu, bir daha bizim millətimizin tolerantlığını göstərir.
Prezident həzrətlərinin bir sözü mənim yadımdan çıxmır. O, çıxışlarının birində demişdir ki, Azərbaycan çoxmillətli ölkədir. Burada hər millətdən olan insanlar yaşayır və onlar öz vicdan azadlığını yerinə yetirməkdə azaddırlar. Onlara bu sahədə hər bir şərait yaradılmışdır.
Prezident həzrətlərinin təbriki və buraya gəlməsi, dini icmaların başçıları ilə bir yerdə mənim burada iştirakım, bir həftə bundan qabaq Sinaqoqun açılması bir daha göstərir ki, həqiqətən də, bizim xalqımız həqiqətən də milliyyətindən, dinindən asılı olmayaraq, bütün xalqlara, hər bir millətin mənəvi dəyərlərinə böyük önəm və qiymət verir. Biz bunu həyatda yerinə yetiririk. Bunların hamısına başçılıq edən bizim Prezidentimiz, öndərimiz, dahi rəhbərimiz Heydər Əliyev həzrətləridir. Yəni biz din xadimləri onun göstərdiyi yolla gedirik.
Mən istərdim Moskvanın və bütün Rusiyanın patriarxı II Aleksinin Bakıya səfəri vaxtı dediyi bir sözü yada salım. Biz təklikdə söhbət edəndə o dedi ki, çox xoşbəxt insansınız ki, sizin belə rəhbəriniz var. O, dinindən asılı olmayaraq bütün xalqlara, bütün millətlərə eyni gözlə baxır və sizə, bütün dini icmaların rəhbərlərinə yaxşı şərait yaradıbdır. Bu baxımdan siz özünüzü xoşbəxt hesab edə bilərsiniz.
Mən özümü xoşbəxt hesab edirəm ki, şeyxülislam kimi fəaliyyətim dövründə ölkəmizin belə rəhbəri, belə öndəri var və bizi belə addımlar atmağa sövq edir.
Mən Qafqaz Xalqları Ali Şurasının adından bu mərasimdə iştirak edənlərin hamısını dilindən, dinindən asılı olmayaraq təbrik edirəm və onlara cansağlığı arzu edirəm. Gələcəkdə də başqa dinlərlə bir yerdə biz bu yolu Prezidentimiz Heydər Əliyevin rəhbərliyi altında gedəcəyik.
X X X
X X X
Mərasimdə ölkəmizdəki dağ yəhudiləri icmasının başçısı Semyon İxiilov çıxış etdi.
Bölmənin digər xəbərləri
