QANUNAUYĞUN NƏTİCƏ
Dəfələrlə dünya və Avropa çempionatlarının, Olimpiya oyunlarının qalibi, tanınmış idmançı Aleksandr İvanitski Finlandiyanın Tampere şəhərində keçirilmiş Avropa çempionatında Azərbaycan pəhləvanlarının uğurlu çıxışını məhz bu cür səciyyələndirmişdir.
AZƏRTAC xəbər verir ki, o, 55 kiloqram çəki dərəcəsində final yarışmasını şərh edərkən qalib adı və 2008-ci ildə Pekində keçiriləcək Olimpiya oyunlarına lisenziya qazanmış Azərbaycan güləşçisi Rövşən Bayramovun yüksək ustalığını, düzgün seçilmiş yarış taktikasını və qələbə əzmini vurğulamışdır. A.İvanitski demişdir ki, bu qələbə təsadüfi deyildir, çünki hazırda Azərbaycanda güləşin inkişafına, yüksək dərəcəli atletlərin hazırlanmasına xüsusi diqqət yetirilir.
O, ötən il Bakıda keçirilən güləş üzrə dünya çempionatından danışaraq qeyd etmişdir ki, ev sahibləri bu mötəbər turniri yüksək səviyyədə təşkil etmişdilər. Biz veteranlar ölkə rəhbərliyinin güləşə necə böyük dəstək göstərdiyinin, bu idman növünün gənclər arasında populyarlığının şahidi olduq. Tanınmış çempion ümidvar olduğunu bildirmişdir ki, tezlikdə Azərbaycan güləşçilərinin şanlı ənənələrini davam etdirən yeni “ulduz”lar fəxri kürsülərə qalxacaqlar.
Bölmənin digər xəbərləri
