“Qarabağ” Futbol Akademiyasının meneceri: Altı oyuna 30 qol buraxmaq yaxşı nəticə deyil - MÜSAHİBƏ
Bakı, 11 dekabr, AZƏRTAC
“Qarabağ” Futbol Akademiyasının meneceri Nail Kərimov AZƏRTAC-ın suallarını cavablandırıb.
- “Qarabağ”ın U-19 komandası UEFA Gənclər Liqasının əsas mərhələsini xalsız və sonuncu pillədə bitirdi. Bu nəticəni necə qiymətləndirirsiniz?
- Turnirdəki çıxışımızı pis qiymətləndirirəm. Ümumiyyətlə, müsbət bir şey deyə bilmərəm. 6 oyunda 30 qol buraxdıq. Təbii ki, bu, yaxşı nəticə deyil. Amma məsələyə yalnız oyunlardakı hesablar üzərindən yanaşmaq istəmirəm. Sizə bir statistika verəcəyəm və sonra bunun səbəbini izah edəcəyəm. 10 turda 8 böyükhesablı məğlubiyyət olub. Böyük hesabla uduzan komandalar arasında “Real Madrid”, “Napoli”, “Liverpul”, “Qalatasaray”, “Slaviya” kimi klublar da var. Bunların klub və akademiya kimi fəaliyyətləri hamıya məlumdur. Bu isə onu göstərir ki, hesablar ölkədə futbolun səviyyəsini və akademiyadakı gənc oyunçuların potensialını müəyyən etmək üçün real faktor deyil. Çünki yaş qrupları burada böyük rol oynaya bilər. Məsələn, bəzi komandalar ən yaxşı oyunçularını, bəziləri ikinci dərəcəli olanları oynadırlar. Digərləri icarədə olur. Yəni, burada söhbət klubun yanaşmasından gedir.
- Demək olarmı ki, komandanın çıxışı əsasən rəqiblərin keyfiyyətindən asılı olub?
- Əslində, burada qeydə alınan nəticələr real vəziyyəti tam ifadə etmir. Məsələn, bizimlə yanaşı, “Nyukasl” və “Budyo-Qlimt” də turniri xal qazanmadan başa vurdu. İngiltərə təmsilçisi haqqında dəqiq deyə bilmərəm ki, əsas komandaya akademiyadan nə qədər uşaq keçid edir. Amma norveçlilərin akademiyası daima əsas komanda üçün futbolçu yetişdirir. Yəni, onların məğlubiyyətlərinə və böyük hesablara baxmayaraq, bu akademiya daim ulduz futbolçular yetişdirir.
Böyükhesablı məğlubiyyətlərimizlə bağlı başqa bir statistik faktı qeyd etmək istəyirəm. Bu, rəqiblərimizin səviyyəsi ilə əlaqəlidir. Oynadığımız altı komandadan dördü play-off mərhələsinə, yəni ilk “22-liy”ə yüksəldi. Rəqiblərimizdən “Çelsi” birinci, “Benfika” ikinci, “Atletik” isə altıncı yeri tutaraq, növbəti raunda adladı. İlk 22 komanda arasına düşə bilməyən yalnız “Kopenhagen” və “Napoli” oldu ki, onlar da sərhəddə qaldılar. Biri 21-ci, digəri isə 25-ci oldu. Yəni, pley-offa düşməyə çox yaxın idilər. Rəqiblərimiz bu qədər güclü olduğu üçün nəticələr belə alındı. Əgər bizə daha uyğun, nisbətən zəif rəqiblər düşsəydi, bəlkə də 5-6 xal toplamaq mümkün olardı. İndiki halda isə sizin sualınıza yalandan “Hər şey əladır” cavabını verə bilməzdim.
- Futbolçularda günah görmürsünüz?
- Mən futbolçuları heç nədə günahlandıra bilmərəm. Burada məsuliyyət böyüklərin üzərinə düşür. Bu, idarəçilərin, klub rəhbərlərinin, məşqçilərin, valideynlərin günahıdır. Mənim, sizin, bir sözlə, hamımızın günahıdır. Amma uşaqların günahı deyil. Mən Azərbaycanda istedadlı futbolçuların olduğuna əsla şübhə etmirəm. Burada potensiallı oyunçuların olduğunu həm yerli, həm də əcnəbi mütəxəssislər qeyd edirlər.
- Oyun baxımından komandadan razı qaldığınız məqamlar oldumu?
- Mən komandanın çıxışını iki hissəyə bölərdim. İlk iki və son oyun bir, ortadakı üç qarşılaşma isə başqa bir hissədir. İlk iki matçda həm biz, həm də futbolçular turniri tanımırdılar. Bu səviyyəli rəqiblərlə heç vaxt oynamamışdılar. Amma ilk iki görüşdə həm biz, həm də futbolçular turnirlə tanış oldu, ritmi gördü. Ondan sonra “Çelsi”yə və “Atletik”ə 0:5 hesabı ilə uduzmağımıza baxmayaraq, oyun baxımından daha yaxşı idik. Artıq meydanda mübarizə, taktiki yanaşma, döyüş ruhu, oyun intizamı görünürdü. Bunların hamısını həmin görüşlərdə görmək mümkün idi. Bunu bizim məşqçilər də təsdiq edə bilərlər. Söhbətlərimizdə dəfələrlə deyilmişdi ki, hesab bizim üçün ikinci məsələdir. Əsas olan odur ki, meydanda nə etdiyini bilən komanda olsun. Mübarizə aparsın və görünsün ki, həm məşqçilər, həm futbolçular birlikdə işləyərək orada nəsə ortaya çıxarırlar. Lakin “Ayaks”la son görüşdə əzm və istəyi görmədik. Bir daha məyus olduq. Bu, hesabda da özünü əks etdirdi. Bir məsələni də qeyd etmək yerinə düşər. Məsələn, “Çelsi”, “Benfika” və “Atletik” yaş ortalaması baxımından bizdən böyük idi. “Ayaks”da isə orta yaş kiçik idi. Ötən gün 2007-2008-ci ildən olan futbolçular əsas komandamıza qarşı oynadılar. Burada böyük fərq ortaya çıxır. Biz öz işimizi layiqincə görsəydik, 20 top buraxmış olardıq. Lakin ümumi analiz etdiyimiz zaman bu da çox sayılır.
- UEFA Gənclər Liqasının oyunları üçün transfer edilən nigeriyalı futbolçular - Tohib Abidun və Muyidin Oludenin performanslarını necə qiymətləndirirsiniz?
- Bizim iştirak ərizəmizdə 4 legioner oyunçu var idi. Onların ikisi çoxdan komandada idilər. Transfer üçün 15 gün vaxtımız var idi. Bu müddət ərzində Tohib və Muyidini cəlb etdik. Onları gətirməkdə məqsədimiz “Çelsi” və “Benfika”nı məğlub etmək deyildi. Sadəcə, daxildəki rəqabəti artırmağı hədəfləyirdik. Bildiyiniz kimi, dünya futbolunda əcnəbi futbolçu gətirmək tendensiyası var. Hər iki oyunçunun çıxışını orta qiymətləndirirəm. Komanda olaraq axsadığımız zaman hansısa oyunçunu fərqləndirmək olmur. Rəqiblərdən geri qaldıq.
Bölmənin digər xəbərləri
