QARABAĞ MÜHARİBƏSİ HAQQINDA ROMAN
Bu yaxınlarda “Təhsil” nəşriyyatında jurnalist-publisist Qalib Arifin Qarabağ müharibəsindən bəhs edən “Müharibə-görəsən, bu nədir?” kitabı çapdan çıxmışdır. Son illər bədii nəsrimizdə müharibə mövzusunda yaranmış boşluğu müəyyən qədər doldurmaq baxımından daha bir təşəbbüs olan kitabda müəllifin eyniadlı romanı, habelə “İnsanlar və dağlar” silsiləsindən iki hekayəsi verilmişdir. Roman, əslində, müxtəlif hadisələrdən və qəhrəmanlardan bəhs edən beş müstəqil povestdən ibarət olsa da, onları vahid ideya, qayə - vətənpərvərlik, doğulduğu bölgədən, kənddən, şəhərdən asılı olmayaraq, hamımızın ümumi Vətəni olan doğma torpaqlarımızı qorumaq borcu və bu müqəddəs amalı təmsil edən baş qəhrəman - Azərbaycan əsgəri Aqşin birləşdirir. Müharibəyə nifrətini bildirən müəllif “müharibə nədir?” sualına qocaman müəllim Arif babanın dili ilə belə cavab verir: “Müharibə... bəşərin özünə, bütün insanlığa qənim kəsilən bir fəlakətdir”. Müəllif bu qənaətə gəlir ki, bütün başqa imkanlar tükəndikdə, torpaqlarımızı düşmən tapdağından azad etmək üçün Azərbaycan xalqı hamılıqla ayağa qalxmalı, ölülərimizin, şəhidlərimizin ruhu, dirilərimizin qeyrəti birləşməlidir.
Bölmənin digər xəbərləri
