“Qarabağ”ın futbolçusu Filip Ozobiç bir neçə aylıq sıradan çıxıb
Bakı, 2 avqust, Nicat Məmmədov, AZƏRTAC
Ağdamın “Qarabağ” klubunun futbolçusu Filip Ozobiç bir neçə aylıq sıradan çıxıb.
Bu barədə AZƏRTAC-a klubun mətbuat katibi Nurlan İbrahimov məlumat verib.
Xorvatiyalı yarımmüdafiəçinin İrlandiyanın “Dundalk” klubu ilə UEFA Çempionlar Liqasının II təsnifat mərhələsinin cavab görüşü zamanı aldığı zədənin ciddi olduğu müəyyənləşib. Diz nahiyəsindən zərbə alan 28 yaşlı oyunçunun əməliyyat olunacağı da istisna deyil.
Ozobiçdən əlavə, ağdamlıların əsas müdafiəçisi sayılan Bədavi Hüseynov da Kiprin APOEL komandası ilə III təsnifat mərhələsinin oyunlarını buraxacaq.
Qeyd edək ki, “Qarabağ” “Dundalk”ı iki oyunun nəticəsində (1:1, 3:0) üstələyib. APOEL ilə ilk oyun avqustun 6-da səfərdə, cavab görüşü isə avqustun 13-də Bakıda olacaq.
Bölmənin digər xəbərləri
