Naxçıvan, 1 noyabr, AZƏRTAC

Regionların sosial-iqtisadi inkişafı dövlət proqramı muxtar respublikada uğurla icra olunur. Kəndlərdə müasir infrastruktur yaradılır, əhalinin sosial problemləri həll olunur. Aparılan quruculuq işləri sırasında içməli su və kanalizasiya şəbəkələrinin qurulması mühüm yer tutur.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, noyabrın 1-də Naxçıvan şəhərinin Qaraçuq, Qaraxanbəyli və Bulqan kəndlərində yeni içməli su və kanalizasiya şəbəkəsi istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov açılış tədbirində iştirak edib.

Naxçıvan Muxtar Respublikası Dövlət Meliorasiya və Su Təsərrüfatı Komitəsinin sədri Əsgər Əsgərov məlumat verib ki, hər üç kənddə içməli su və kanalizasiya sistemlərinin tikintisinə bu ilin yanvar ayında başlanıb. Ümumilikdə kəndlərdə 51,1 kilometr içməli su və 47 kilometr kanalizasiya xətti çəkilib, su şəbəkəsinin üzərində 25 yanğın hidrantı və 1 təzyiq azaldıcı qoyulub. Suyun öz axımı ilə mənzillərə verilməsi təmin edilib, sayğaclar quraşdırılıb. Tikinti işləri aparılarkən çirkab suların təmizləyici qurğuya vurulması üçün Qaraçuq kəndində nasos stansiyası tikilib, hər birinin məhsuldarlığı saniyədə 40 litr olan 3 nasos quraşdırılıb, 3,1 kilometr təzyiqli boru xətti çəkilib.

Naxçıvan Muxtar Respublikası Ali Məclisinin Sədri Vasif Talıbov içməli su və kanalizasiya şəbəkəsinin istifadəyə verilməsi münasibətilə sakinləri təbrik edərək deyib: 1970-ci ildə Araz Su Elektrik Stansiyasının tikilməsi ilə əlaqədar Qaraçuq və Bulqan kəndlərinin əhalisi indiki əraziyə köçürülüb. Həmin dövrdən başlayaraq Qaraçuq, Qaraxanbəyli və Bulqan kəndlərində əhalinin içməli su təminatında problemlər mövcud idi. 2000-ci illərdə Naxçıvan şəhərinin içməli su təminatının yaxşılaşdırılması tədbirləri çərçivəsində yeni kaptajlar tikildi, Qaraçuq, Qaraxanbəyli və Bulqan kəndlərində içməli su təminatı qismən yaxşılaşdırıldı. Bu gün kəndlərdə içməli su problemi tamamilə həll olunmuş, yeni içməli su və kanalizasiya şəbəkəsi qurulmuş, müasir şəhər infrastrukturu yaradılmışdır. Bütün bunlar isə ölkə Prezidentinin imzaladığı Qanunla 2009-cu ildə Bulqan, Hacıniyyət, Qaraçuq, Qaraxanbəyli və Tumbul kəndlərinin Naxçıvan şəhərinə birləşdirilməsindən sonra mümkün olmuşdur. Asiya İnkişaf Bankı ilə bağlanmış kredit sazişi əsasında Naxçıvan şəhərinin içməli su və kanalizasiya sistemlərinin yenidən qurulması layihəsi çərçivəsində Qaraçuq, Qaraxanbəyli və Bulqan kəndlərində də yeni içməli su və kanalizasiya şəbəkəsi qurulmuşdur.

Ali Məclisin Sədri deyib: Yaşayış məntəqələrində su və kanalizasiya sistemlərinin qurulması vacib məsələdir. Çünki su həyatdır, təmizlikdir. Qaraçuq, Qaraxanbəyli və Bulqan kəndlərində içməli su və kanalizasiya sistemlərinin yenidən qurulması layihəsi üzrə işlər müasir şəhərsalma prinsipləri əsasında aparılmış, 100 kilometrə yaxın müxtəlif diametrli boru xətləri çəkilmişdir. Su və kanalizasiya şəbəkəsi hər üç kənddə 1300 evi və 8 minə yaxın əhalini əhatə edir. Kənd sakinləri ekoloji təmiz və dayanıqlı içməli su ilə təmin olunmuşdur. Sakinlər də tikilənləri, qurulanları qorumalı, sudan qənaətlə və səmərəli istifadə etməlidirlər.

Ali Məclisin Sədri deyib: Son illər Qaraçuq, Qaraxanbəyli və Bulqan kəndlərində geniş quruculuq işləri də aparılmış, Qaraçuq və Qaraxanbəyli kənd inzibati ərazi dairəsi üzrə nümayəndəliklər yaradılmışdır. Kəndlərdə insanların rahat yaşaması üçün bütün tədbirlər görülmüş, kənd yolları yenidən qurulmuş, kənd və xidmət mərkəzləri, məktəb binaları istifadəyə verilmiş, səhiyyə və rabitə xidməti təşkil olunmuş, geniş abadlıq işləri həyata keçirilmişdir. Bu gün isə Bulqanda kənd və xidmət mərkəzləri istifadəyə verilir. Bu tədbirlərin həyata keçirilməsində məqsəd kəndlərdə insanların rahat yaşayışını təmin etməkdən ibarətdir. Dövlətimiz tərəfindən kəndlərin inkişafı sahəsində həyata keçirilən tədbirlər bundan sonra da davam etdiriləcəkdir. Yaradılan şəraitdən səmərəli istifadə etmək, tikilənləri qorumaq, torpaqları əkmək və təsərrüfatları genişləndirmək isə sakinlərin üzərinə düşən vəzifədir.

Ali Məclisin Sədri sakinləri bir daha təbrik edib, onlara firavan həyat arzulayıb.

Qaraxanbəyli kənd sakini Məmməd Məmmədov minnətdarlıq edərək deyib: Son illər muxtar respublikada aparılan quruculuq işləri sakinlərə rahat və firavan həyat bəxş edib. Qaraçuq, Qaraxanbəyli və Bulqan kəndlərində içməli su problemi var idi. Sakinlər öz məhəllələrində su kranlarının quraşdırılacağını xəyal edirdilər. Lakin bu gün hər bir evə su və kanalizasiya xətti çəkilib, insanlar öz mənzillərində təmiz və dayanıqlı su ilə təmin olunublar. Həmçinin kəndlərdə geniş quruculuq, abadlıq işləri aparılıb, sosial obyektlər istifadəyə verilib, şəhər rahatlığı yaradılıb. Bütün bunlar ölkəmizdəki inkişafın, sabitliyin, ən əsası isə insana qayğının daha bir ifadəsidir.

Ali Məclisin Sədri Qaraçuq, Qaraxanbəyli və Bulqan kəndlərində yeni içməli su və kanalizasiya şəbəkəsinin istifadəyə verilməsini bildirən qurğunu işə salıb.

Bulqan Kənd Mərkəzinin açılışı olub

Noyabrın 1-də Bulqan Kənd Mərkəzinin açılışı olub.

Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsib.

Məlumat verilib ki, ikimərtəbəli binada rabitə evi, feldşer-mama məntəqəsi, polis sahə və baytarlıq məntəqələri, kitabxana, Yeni Azərbaycan Partiyası ərazi ilk təşkilatı, inzibati ərazi dairəsi üzrə nümayəndəlik və 73 yerlik iclas zalı yerləşir. Kitabxana fondunda 2500-dən artıq ədəbiyyat vardır. Kəndə fiber-optik xətt çəkilib, rabitə evində poçt bölməsi fəaliyyətə başlayıb, 384 yerlik yeni nəsil ATS quraşdırılıb, sürətli internetdən istifadə imkanları yaradılıb.

Yeni Azərbaycan Partiyası Bulqan kənd ərazi ilk təşkilatının 114 üzvü vardır. Onlardan 42-si gənclər, 46-sı isə qadınlardır. Geniş iclas zalı kənddə mədəni-kütləvi tədbirlərin keçirilməsinə imkan verəcəkdir.

Binanın birinci mərtəbəsində yerləşən feldşer-mama məntəqəsi 3 otaqdan ibarətdir. Məntəqəyə peyvənd və ilkin tibbi yardım çantaları, dərman preparatları və tibbi avadanlıqlar qoyulub.

Ali Məclisin Sədri kənddə səhiyyə xidmətinin təşkili ilə maraqlanıb, tibbi qeydiyyatın aparılması və səhiyyə maarifi işinin təşkili ilə bağlı müvafiq tapşırıq və tövsiyələrini verib.

Kənddə yeni xidmət sahəsi yaradılıb

Muxtar respublikanın kəndlərində tikilən xidmət mərkəzlərində yeni iş yerləri açılmaqla yanaşı, həm də sakinlərin gündəlik məişət tələbatı ödənilir, kəndlərdə istehsal olunan məhsullar satışa çıxarılır.

Noyabrın 1-də Bulqan kəndində xidmət mərkəzi istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov mərkəzin açılışını edib, yaradılan şəraitlə maraqlanıb.

Bildirilib ki, xidmət mərkəzində bərbərxana, qadın gözəllik salonu, ət satışı yeri, ərzaq və təsərrüfat malları mağazaları fəaliyyət göstərir. 5 nəfərin işlə təmin olunduğu mərkəzdə yerli məhsulların satışına üstünlük verilir.

Xidmət mərkəzi ilə tanışlıqdan sonra Ali Məclisin Sədri Bulqan kənd sakinləri ilə görüşüb, kənddə əhalinin tələbatını ödəmək imkanında olan yeni xidmət sahələrinin yaradıldığını və iş yerlərinin açıldığını bildirib.

Bulqan kəndində abadlıq işləri də görülüb, 1340 metr müxtəlif tutumlu rabitə xətti çəkilib, 1500 metr müxtəlif diametrli qaz xətlərində təmir-bərpa işləri aparılıb.