QAZANILAN NAİLİYYƏT BİRGƏ ƏMƏKDAŞLIĞIN NƏTİCƏSİDİR
Avropa Birliyinin vəsaiti və Azərbaycan dövlətinin dəstəyi ilə respublikamızda fəaliyyət göstərən “Cənubi Qafqazda narkotiklərə nəzarət” SCAD Proqramı ilə Dövlət Gömrük Komitəsi arasında birgə əməkdaşlıq çox uğurlu olmuşdur. Belə ki, üç ildən artıq bir müddətdə DGK-nın fəaliyyəti avropalı mütəxəssislər tərəfindən yaxından öyrənilmiş, mövcud sahələrdəki problemlərin aradan qaldırılması üçün onların tövsiyəsinə əsasən müəyyən layihələr, planlar işlənib hazırlanmış və həyata keçirilmişdir.
SCAD proqramının milli əlaqələndiricisi Məzahir Əfəndiyev AZƏRTAC-a bildirmişdir ki, bütün bunlar komitənin maddi-texniki problemlərinin aradan qaldırılması, eyni zamanda, quraşdırılan müasir texniki cihazların idarə edilməsi qaçaqmalçılığın qarşısının alınmasında gömrük əməkdaşlarının peşəkarlığının artırılmasına səbəb olmuşdur.
