QAZAXDA İCTİMAİ DİNLƏMƏ KEÇİRİLMİŞDİR
Ombudsman Elmira Süleymanova insan hüquqlarının müdafiəsi üzrə Milli Fəaliyyət Planının (MFP) təbliği və tətbiqi vəziyyətinin araşdırılması məqsədi ilə növbəti ictimai dinləməni Qazaxda keçirmişdir.
Ombudsman Aparatından AZƏRTAC-a bildirmişlər ki, rayon icra hakimiyyətinin və bələdiyyələrin, məhkəmə, daxili işlər şöbəsi və prokurorluğun, dairə seçki komissiyalarının, yerli qeyri-hökumət təşkilatlarının və icmaların nümayəndələrinin iştirak etdikləri tədbirdə E.Süleymanova ictimai dinləmənin əhəmiyyətini, insan hüquq və azadlıqlarının müdafiəsinin dövlətin qarşısında duran ən mühüm vəzifələrdən biri olduğunu vurğulamışdır. O, insan hüquqları sahəsində geniş islahatların aparıldığını, MFP-nin təsdiqindən ötən müddətdə ölkəmizin bütün rayonlarında sənədin tətbiqi ilə bağlı ictimai dinləmələrin keçirildiyini söyləmişdir.
Müzakirələrdə çıxış edənlər MFP-də məhkəmə, prokurorluq və polis orqanları qarşısında qoyulmuş vəzifələrin icrasından danışmışlar.
Ombudsman Qazax Rayon Polis Şöbəsinin müvəqqəti saxlama təcridxanasına da baxmışdır.
