Qazaxda şəhid Xaliddin Nəsibovun xatirəsinə inşa olunan bulaq kompleksi istifadəyə verilib VİDEO
Qazax, 4 may, Ruslan Novruzoğlu, AZƏRTAC
Vətən torpaqlarını qanı bahasına qoruyan, bu yolda canından keçən igid oğullarımızdan biri də şəhid baş leytenant Xaliddin Nəsibovdur. Qazaxda şəhidin xatirəsinə bulaq kompleksi inşa edilib.
AZƏRTAC xəbər verir ki, baş leytenant Xaliddin Nəsibov 44 günlük Vətən müharibəsində Xocavəndin azadlığı uğrunda gedən döyüşdə şəhidlik zirvəsinə yüksəlib. Onun ulu babası Qafqaz Ordusunda, atası Birinci Qarabağ, özü isə Vətən müharibəsində ermənilərə qarşı vuruşub. Qazax rayonunun Qarapapaq kəndində anadan olan Xaliddin ailədə bir bacı, bir qardaş olublar. Onun uşaq yaşlarından hərb sahəsinə xüsusi marağı vardı. Anası deyir ki, Xaliddin onunla telefonla sonuncu dəfə noyabrın 3-də danışıb. Döyüşlərdə qazandığımız qələbə sevincini hər dəfə valideynləri ilə bölüşərmiş: “Mənimlə qələbə xəbərlərini bölüşəndə dedim ki, Xaliddin, o gün olsun Şuşaya bayraq sancasan. O qədər sevincli idi ki... Dedi, ana, inşallah Şuşaya bayrağı sancıb gələcəyik. Sevinirəm ki, o, Qarabağ torpaqlarının azad olunmasını görə bildi”, - deyə Xaliddinin anası Sevda Nəsibova bildirir.
Xaliddin Vətən müharibəsi başlayanda motoatıcı taqım komandiri kimi döyüşlərə qatılıb. Döyüşlərdə bölük komandiri yaralandığından həlledici döyüşü öz üzərinə götürüb və bu döyüş uğurlu olub. Buna görə vaxtından əvvəl döyüş meydanında ona baş leytenant rütbəsi verilib.
Birinci Qarabağ müharibəsinin iştirakçısı olan atası Vaqif Nəsibov deyir ki, oğlunun arzusu general olmaq idi. Hətta vətənpərvərlik mövzusunda şeirlər də yazıb. İndi onun şeirləri “Yarımçıq qalmış şeir dəftəri” adlı kitabda nəşr edilib. “Oğlumun vətənpərvər ruhda böyüməsinə səbəb bizim ailədə, nəsildə hərbçilərin olmasıdır. Çünki o, hərbçi ailəsində anadan olmuşdu. Biz 3 qardaşıq, üçümüz də hərbçi idik. Babalarım da hərbçi olub. Dayım Mahmud Həmzəyev general olduğu üçün həmişə ona baxıb qürurlanırdı. Xaliddinin əşyaları gətiriləndə arasından yarımçıq yazılmış dəftəri çıxdı. Baxdım ki, şeirlər yazıb. Əksəriyyəti də vətənpərvərlik mövzusunda idi”, - deyə şəhidin atası Vaqif Nəsibov əlavə edir.
Qazaxda şəhidlərin xatirəsinə həsr olunan “Qarabağ Azərbaycandır!” abidə kompleksində onun adına bulaq da inşa edilib. Eyni zamanda, onunla birgə şəhidlik zirvəsinə ucalan hərbçi yoldaşlarının da şəkilləri abidədə yer alıb.
Açılış mərasimində iştirak edənlər Azərbaycan Ordusunun 44 günlük Vətən müharibəsində qazandığı şanlı Qələbədən danışıb, həmin Zəfərdə payı olan Xaliddin kimi qəhrəman oğullarımızla bu gün hər birimizin fəxr etdiyini bildiriblər. Qeyd olunub ki, şəhidlik zirvəsinə ucalan Xaliddin kimi igid oğullarla gələcək nəsillər də qürur duyacaq, onlar daim ehtiramla xatırlanacaqlar.
Xaliddin Nəsibov “Vətən uğrunda”, “Xocavəndin azad olunmasına görə”, “Cəsur döyüşçü” medalları və “Azərbaycan Bayrağı” ordeni ilə təltif olunub.
Bölmənin digər xəbərləri
