Qazaxıstan 5 ayda karbohidrogen hasilatını artırıb
Nur-Sultan, 9 iyun, AZƏRTAC
Yanvar-may aylarında Qazaxıstanda 38,5 milyon ton karbohidrogen hasil edilib ki, bu da ötən ilin analoji dövrünün göstəricisindən 5 faiz yüksəkdir.
AZƏRTAC xəbər verir ki, bu barədə Energetika naziri Nurlan Noqayev deyib.
Beş ayda 205 min ton benzin Avropa ölkələrinə və Mərkəzi Asiya ölkələrinə ixrac edilib. Qazaxıstanın 3 iri neft yatağından yalnız "Tengiz"dən istehsal 1 faiz azalaraq 12,4 milyon tona enib. “Kaşaqan” yatağında 7,1 milyon ton neft hasil edib ki, bu da ötən ilin yanvar-may ayları ilə müqayisədə 65 faiz çoxdur. “Qaraçaqanak” yatağında da hasilat 4 faiz, yəni 5,2 milyon tonadək artıb.
Hesabat dövründə ölkədən 31,4 milyon ton xammal ixrac olunub ki, bu da ötən ilin göstəricisindən 8 faiz yüksəkdir. Ümumiyyətlə cari il üçün Qazaxıstanda illik neft hasilatının ötən ilə görə 86 milyon tonadək azalması planlaşdırılır ki, bunun da 67,5 milyon tonu ixrac ediləcək.
Xatırladaq ki, Qazaxıstan “OPEC+” razılaşmasının müddətinin uzadılmasını dəstəkləyib və ölkədə neft hasilatı daha bir ay hazırkı səviyyədə saxlanılacaq.
İlahə Əhmədova
AZƏRTAC-ın xüsusi müxbiri
Nur-Sultan
Bölmənin digər xəbərləri
