Qazaxıstan paytaxtında “Astana-2025” Beynəlxalq Forumu keçirilir
Astana, 29 may, AZƏRTAC
Cümə axşamı, mayın 29-da Qazaxıstanın paytaxtında respublika Prezidenti Kasım-Jomart Tokayevin iştirakı ilə “Astana-2025” Beynəlxalq Forumu açılıb.
AZƏRTAC xəbər verir ki, “Fikirləri birləşdirərək, gələcəyi formalaşdırırıq” devizi altında keçirilən forumda 70-dən çox ölkədən nümayəndələr və xarici medianın 100-ə yaxın təmsilçisi iştirak edir.
Forumun əsas məruzəçiləri arasında Ruanda Prezidenti Pol Kaqame və Qlobal Yaşıl İnkişaf İnstitutunun sədri Pan Gi Mun da var.
Astana Beynəlxalq Forumu Mərkəzi Asiya regionunda ən böyük tədbirdir. Bu, xarici hökumətlərin, beynəlxalq təşkilatların, iri şirkətlərin, işgüzar və elmi dairələrin yüksəksəviyyəli nümayəndələri arasında beynəlxalq gündəlikdəki əsas məsələlər - xarici siyasət, iqtisadiyyat və maliyyə, təhlükəsizlik, davamlı inkişaf, enerji və iqlim üzrə dialoq üçün qlobal platformadır.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
