Qazaxıstan Prezidenti: Müstəqillik illərində neft hasilatı dörd dəfə artıb
Bakı, 5 sentyabr, AZƏRTAC
Qazaxıstan Prezidenti Kasım-Jomart Tokayev ölkənin neft-qaz sənayesinin 125 illik yubileyi münasibətilə keçirilən tədbirdə bildirib ki, neft və qaz qazax xalqının milli sərvətidir.
AZƏRTAC “Kazinform” agentliyinə istinadla xəbər verir ki, müstəqillik illərində neft hasilatının dörd dəfə artığını diqqətə çatdıran Tokayev əlavə edib: “Atırau Neft Emalı Zavodu 80 il əvvəl istifadəyə verilib. Çimkənd Neft Emalı Zavodunun kollektivi 40, “QazaqQaz” milli şirkəti isə dörddəbir əsrlik yubileylərini qeyd edir. Şübhəsiz ki, bu əlamətdar tarixlər neft-qaz sənayesinin ölkə üçün əhəmiyyətini əyani şəkildə nümayiş etdirir. Bildiyiniz kimi, neft və qaz bizim strateji əhəmiyyətli ehtiyatımızdır. Neft sənayesi Qazaxıstanın iqtisadi artımını və rifahını müəyyən edir. Müstəqillik illərində biz “qara qızıl”ın dəyərini tam hiss etdik. Hazırda bu sənaye dinamik inkişaf edir. Qazaxıstan qlobal neft bazarında lider mövqe tutur, ölkədə neft hasilatı 4 dəfə artıb və tezliklə ildə 100 milyon tona çatacaq”.
Qazaxıstanın dövlət başçısı vurğulayıb ki, Atırau, Pavlodar və Çimkənddə üç böyük neft emalı zavodu modernləşdirilib ki, bu da daxili bazarı yüksəkkeyfiyyətli yanacaq-sürtkü materialları ilə tam təmin etməyə imkan verib. O vurğulayıb: “Məqsədyönlü işlər sayəsində 13 milyona yaxın insan təbii qazla təmin olunub. Bu gün bu sahədə misli görünməmiş irimiqyaslı layihələr həyata keçirilir. Kaşaqanda yeni qaz emalı zavodu və Beyneu-Bozoy-Çimkənd qaz kəmərinin ikinci xətti tikilir. Biz, həmçinin yüksək əlavə dəyəri olan məhsulların istehsalına başlamışıq, 20 minə yaxın iş yeri yaradacaq iri neft-kimya layihələrinin reallaşdırılması planlaşdırılır. Onların arasında mühüm yer xarici investorlarla birgə tikilən Polietilen zavoduna məxsusdur. Bu layihəyə qoyulan investisiyaların həcmi 7 milyard dolları ötür. “Kəlamkas-dəniz” və “Xəzər” kimi iri dəniz yataqlarının işlənməsi 6 milyard dollardan çox investisiya həcmi ilə başlayır. Dəniz platformalarının tikintisi yerli gəmiqayırma zavodlarında həyata keçiriləcək ki, bu da Qazaxıstanın neft-qaz sənayesi üçün böyük hadisə olacaq. Bütün bu layihələr enerji potensialının gücləndirilməsinə və ölkə iqtisadiyyatının bütün vətəndaşların mənafeyi naminə mütərəqqi artımına töhfə verəcək”.
Bölmənin digər xəbərləri
