Qazaxıstan Qəzza əhalisi üçün humanitar dəhliz açılmasına çağırıb
Bakı, 3 noyabr, AZƏRTAC
Qazaxıstan Yaxın Şərqdə vəziyyətin gərginləşməsindən narahatdır və Qəzza sektorunda yaşayan əhali üçün humanitar dəhlizlərin açılmasına çağırır.
AZƏRTAC Kazinform agentliyinə istinadla xəbər verir ki, bunu Qazaxıstan Baş nazirinin müavini - xarici işlər naziri Murat Nurtleu Türk Dövlətləri Təşkilatının xarici siyasət idarələri rəhbərləri şurasının Astanada keçirilən iclasında deyib.
“Ölkələrimizin və xalqlarımızın sabitliyini və rifahını təmin etmək üçün mövcud geosiyasi təlatümlər və iqtisadi çağırışlar bizdən Türk Dövlətləri Təşkilatı çərçivəsində birgə səylər tələb edir. Qazaxıstan Yaxın Şərqdə zorakılığın artmasından çox narahatdır və biz dərhal atəşkəsə çağıran beynəlxalq ictimaiyyətə qoşuluruq. Qəzza əhalisi üçün humanitar dəhlizin açılması diplomatiyamızın prioritet vəzifəsidir”, - deyə Murat Nurtleu bildirib. Onun sözlərinə görə, münaqişə tərəfləri diqqətlərini sülh danışıqlarına yönəltməlidir.
Qeyd edək ki, bu gün Astanada Türk Dövlətləri Təşkilatının 10-cu Zirvə görüşü keçirilir. Sammitdə təşkilata üzv olan Türkiyə, Azərbaycan, Qazaxıstan, Qırğızıstan və Özbəkistanla yanaşı, müşahidəçi olan Macarıstan və Türkmənistan rəhbərləri iştirak edirlər.
Bölmənin digər xəbərləri
