Qazi Emin Rzayev Respublika Klinik Xəstəxanasında əməliyyat olunub
Bakı, 5 oktyabr, AZƏRTAC
Gədəbəy rayonunun Söyüdlü kənd sakini, 1996-cı il təvəllüdlü Vətən müharibəsi qazisi Rzayev Emin Fəxrəddin oğlu TƏBİB-in tabeliyində olan Akademik M.Ə.Mirqasımov adına Respublika Klinik Xəstəxanasında əməliyyat olunub.
Xəstəxananın mətbuat xidmətindən AZƏRTAC-a bildirilib ki, Emin Rzayev xəstəxananın II Cərrahiyyə şöbəsinin müdiri, professor Sahib Hüseynov tərəfindən müayinə edilib, xəstəyə pilonidal sist diaqnozu qoyulub. Sistin kəsiklə çıxarılması cərrahi əməliyyatı həkim cərrah Sahib Hüseynov və Toğrul Məhərrəmov tərəfindən icra olunub. Qazimiz ona göstərilən diqqət və qayğıya görə əməliyyat keçirən həkimlərə və xəstəxananın direktoru Elviz Qasımova minnətdarlığını bildirib.
Vətən müharibəsi qazisi Rzayev Emin Fəxrəddin oğlu 1996-cı ildə Gədəbəy rayonunun Söyüdlü kəndində anadan olub. Azərbaycanın Xocavənd, Füzuli və Cəbrayıl rayonlarının işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin sərəncamlarına əsasən Emin Rzayev “Xocavəndin azad olunmasına görə”, “Füzulinin azad olunmasına görə” , “Cəbrayılın azad olunmasına görə” və “Vətən müharibəsi iştirakçısı” medalları ilə təltif edilib.
Bölmənin digər xəbərləri
