SİYASƏT
Qənirə Paşayeva: Zirvə görüşünün təşkili Azərbaycanın beynəlxalq əməkdaşlığa mühüm töhfəsidir
Bakı, 8 may, Səadət Hakıyeva, AZƏRTAC
Prezident İlham Əliyevin təşəbbüsü ilə Qoşulmama Hərəkatının Təmas Qrupu formatında Zirvə görüşünün keçirilməsi bu təsisatın qlobal həmrəylik və əməkdaşlıq istiqamətində səmərəli platformaya çevrildiyini göstərir. Qlobal həmrəyliyin təmsilçisi rolunda çıxış edən Azərbaycanın təşəbbüsü ilə ard-arda iki mötəbər tədbirin təşkili ölkəmizin qlobal pandemiya ilə mübarizədə dünya dövlətlərini səfərbər etmək niyyətinin xoş təzahürü və beynəlxalq əməkdaşlığa töhfəsidir.
Bu fikirləri AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva söyləyib.
Qənirə Paşayeva deyib ki, Azərbaycan Prezidentinin təşəbbüsü ilə “COVID-19-a qarşı birlikdəyik” mövzusunda keçirilən Zirvə görüşü üzv dövlətlər tərəfindən yekdilliklə dəstəklənib. Bu fakt özlüyündə böyük önəm kəsb edir. Təmas Qrupunda coğrafi təmsilçilik və könüllü iştirak əsasında bütün regional qruplardan ölkələr təmsil olunublar. Koronavirus pandemiyasının ümumi bəlaya çevrildiyi bir vaxtda Azərbaycan Zirvə görüşünü təşkil etməklə hər zaman bir-birinə əks qütblərdə olan Qoşulmama Hərəkatı ilə Avropa İttifaqını bir araya gətirməyə nail olub. Avropa İttifaqının rəsmisinin Zirvə görüşündə iştirakı və çıxışı Qoşulmama Hərəkatının tarixində ilk dəfədir ki, baş verirdi. Bütün bunlar Azərbaycan Prezidentinin uzaqgörən siyasətinin nəticəsidir.
“Koronavirus pandemiyasının dünyanı iflic etdiyi bir vaxtda qlobal həmrəyliyə və əməkdaşlığa böyük ehtiyac duyulur. Təcrübə göstərdi ki, bu çətin şəraitdə bir çox ölkələr, həm də bir sıra beynəlxalq təşkilatlar adekvat reaksiya göstərə bilmədilər və zəruri addımlar atmaqda çətinlik çəkdilər. Qlobal həmrəyliyə və liderliyə ehtiyac duyulan bir şəraitdə Azərbaycan Prezidenti “özünəqapanma sindromu”nun heç kəsə xeyir gətirməyəcəyini bildirdi. Qoşulmama Hərəkatının sədri məhz belə dövrdə dünyanın ayrı-ayrı qitələrindən müxtəlif siyasi və ideoloji quruluşlara malik ölkələri bir araya gətirməyə nail oldu. Azərbaycan bir daha təsdiq etdi ki, hərəkata sədrliyi öz üzərinə götürərkən verdiyi vədlərə qətiyyətlə əməl edir”, - deyə Qənirə Paşayeva vurğulayıb.
Komitə sədri bildirib ki, Azərbaycanın beynəlxalq əməkdaşlığa və həmrəyliyə çağırışları və bu istiqamətdə fəaliyyəti dünya dövlətləri tərəfindən təqdir olunur və alqışlanır. Qırxa yaxın ölkənin dövlət və hökumət başçılarının, Xarici İşlər nazirlərinin, BMT Baş Assambleyası prezidentinin, Afrika İttifaqı sədrinin, Ümumdünya Səhiyyə Təşkilatının Baş direktorunun iştirak etdikləri Qoşulmama Hərəkatının Təmas Qrupunun Zirvə toplantısı bir daha Azərbaycana etimadın göstəricisidir.
Qənirə Paşayeva diqqətə çatdırıb ki, aparılan islahatların nəticəsidir ki, Azərbaycan bugünkü gündə COVID-19 pandemiyası ilə mübarizədə digər ölkələrə nümunə göstərir. Ölkəmizdə vaxtında qabaqlayıcı tədbirlərin görülməsi və düşünülmüş siyasət nəticəsində vəziyyət nəzarətdə saxlanıldı və xalqımız böyük itkilər yaşamadı.
“Koronavirus pandemiyasının bütün dünyada tüğyan etdiyi, yüz minlərlə insanın öldüyü, iqtisadi böhranın yaşandığı bir dövrdə Azərbaycan dövləti düzgün siyasət yürütməklə infeksiyanın geniş yayılmasının qarşısının alınması, itkilərin az olması, eləcə də sosial-iqtisadi sahədə problemlərin aradan qaldırılması sahəsində inanılmaz təcrübə nümayiş etdirdi. Vaxtında həyata keçirilən kompleks və qabaqlayıcı tədbirlər öz müsbət nəticəsini verdi. Dəstək proqramı çərçivəsində vətəndaşların məmnunluğu və iqtisadiyyatın dayanıqlığı nəzarətdə saxlanıldı”, - deyə deputat qeyd edib.