Qırğızıstan dövlət televiziyasında Azərbaycana həsr olunmuş veriliş yayımlanıb
Bişkek, 8 may, AZƏRTAC
Qırğızıstanda fəaliyyət göstərən soydaşlarımız Hökümə Xəlilova və Ramiz Məşədihəsənlinin növbəti layihəsi əsasında “Piramida” dövlət televiziya kanalında hər həftə efirə çıxan “Dostluq körpüsü” proqramının bugünkü sayında Azərbaycanın neft strategiyası təqdim olunub.
Rus dilində yayımlanan 40 dəqiqəlik verilişdə Azərbaycanın neft tarixi, Heydər Əliyevin yürütdüyü uğurlu neft strategiyası, İkinci Dünya müharibəsində qələbənin əldə olunmasında Bakı neftinin oynadığı böyük rol, Hitlerin planlarından birinin Bakı neftini ələ keçirmək olduğu, müharibə dövründə Yusif Məmmədəliyevin elmi kəşflərindən bəhs edən çıxışından fraqment, Prezident İlham Əliyevin ötən ilin oktyabrında Bakıda keçirilən Türkdilli ölkələrin dövlət başçılarının Zirvə görüşü, ölkəmizdə gedən quruculuq işləri, gənclər, elm, təhsil, turizm sahələrindəki yeniliklərdən bəhs edən materiallar təqdim olunub.
“Dostluq körpüsü” verilişində Qırğızıstanda yaşayan soydaşımız, Azərbaycan Mədəniyyət Mərkəzi sədrinin müavini, Əməkdar inşaatçı, Qırğızıstanın fəxri vətəndaşı, müharibə veteranı Əsəd Həsənovun döyüş yolu və fəaliyyətinə də geniş yer verilib.
TÜRKEL Media Qrupunun prezidenti Hökümə Xəlilova AZƏRTAC-ın müxbirinə bildirib ki, növbəti telelayihə çərçivəsində 28 may - Respublika Günü münasibətilə xüsusi buraxılış hazırlanır. Bundan əlavə, tarixi vətənimizin xaricdə tanıdılması üçün silsilə verilişlər davam etdiriləcək.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
