Qobustan, 21 aprel (AZƏRTAC). Qobustan Rayon İcra Hakimiyyətində 2012-ci ilin birinci rübündə sosial-iqtisadi inkişafın yekunları və qarşıda duran vəzifələrə həsr edilmiş hesabat yığıncağı keçirilmişdir.

AZƏRTAC xəbər verir ki, rübün yekunları ilə bağlı hesabat məruzəsi dinlənilmiş, müzakirələr aparılmışdır. Əsas diqqət Prezident İlham Əliyevin sədrliyi ilə Nazirlər Kabinetinin aprelin 16-da keçirilən 2012-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr edilmiş iclasının yekunlarına, iclasda dövlətimizin başçısının nitqində irəli sürülən müddəalara cəlb yönəldilmişdir.

Qeyd edilmişdir ki, hesabat dövründə rayonda ümumi məhsul buraxılışının həcmi ötən ilin müvafiq dövrü ilə müqayisədə 1,8 dəfə artaraq 18 milyon 171,8 min manat olmuşdur. Bu artım sənayedə 55,9 faiz, kənd təsərrüfatında 7 faiz, ticarətdə 3,9 dəfə, nəqliyyatda 8,4 faiz təşkil etmişdir. Bu dövrdə əhaliyə göstərilən pullu xidmətlərin həcmi 30,1 faiz, pərakəndə əmtəə dövriyyəsi 16,6 faiz artmışdır. Rayon üzrə əhalinin orta aylıq əmək haqqı 18,2 faiz artaraq 254,6 manata çatmışdır. Reallaşdırılan layihələr, həyata keçirilən tədbirlər nəticəsində ilin birinci rübündə 393 yeni iş yeri açılmışdır ki, bundan da 82-si daimidir.

Bildirilmişdir ki, aqrar sahə rayon iqtisadiyyatında aparıcı yer tutur. Ənənəvi sahə olan heyvandarlıqda dinamik inkişaf davam etməkdədir. Birinci rübdə diri çəkidə ət istehsalı 1,1 faiz, süd 1,2 faiz, yumurta isə 1,1 faiz artmışdır. Mal-qaranın cins tərkibinin yaxşılaşdırılması məqsədilə 74 baş qaramal süni mayalandırılmış, 29 baş cins bala alınmışdır. Rayonda quşçuluğun inkişafı üçün ciddi tədbirlər həyata keçirilir. Hazırda 105 min başlıq quşçuluq müəssisəsinin tikintisi tamamlanmaq üzrədir.

Hesabat dövründə 1445 hektar sahədə yazlıq bitkiləri əkilmişdir ki, bu, ötən ilin müvafiq dövrü ilə müqayisədə 12,5 faiz çoxdur. Hazırda əkin sahələrinə aqrotexniki qulluq göstərilir.

Aqrar sahənin inkişafında mühüm rol oynayan, fermerlərin yaxın köməkçisinə çevrilən “Aqrolizinq” ASC Qobustan filialının maddi-texniki bazasının möhkəmləndirilməsi, fəaliyyətinin yaxşılaşdırılması məqsədilə Təklə kəndində inzibati idarə binası, anbar və talvarlardan ibarət mərkəzin inşasına başlanılmışdır.

Qeyd olunmuşdur ki, rayonda sahibkarlığın inkişafına qayğı diqqət mərkəzindədir. 2012-ci ilin birinci rübündə sahibkarlara 6 layihə üzrə 69 min manat kredit verilmişdir.

Yığıncaqda rayonda həyata keçirilən geniş tikinti-quruculuq işlərindən ətraflı danışılmışdır. Göstərilmişdir ki, hazırda rayon mərkəzində idman kompleksinin, gənclər evinin, statistika idarəsi üçün inzibati binanın, Cəmcəmli kəndində 120 şagird yerlik, Göydərə kəndində 80 şagird yerlik məktəb binalarının tikintisi davam etdirilir. Qobustan şəhərindəki 3 nömrəli uşaq bağçasının əsaslı təmiri başa çatır.

Hazırda “Acıdərə” adlanan ərazidə XX əsrin əvvəllərində erməni daşnaklarına qarşı mübarizədə şəhid olmuş qəhrəman türk zabitinin şərəfinə salınmış abidə kompleksinin və parkın inşası başa çatmaq üzrədir.

Hesabat yığıncağında əhalinin təbii qaz, elektrik enerjisi ilə təminatı, su təchizatı sahələrində görülmüş işlərdən, reallaşdırılan layihələrdən, bu sahələrdə həlli vacib məsələlərdən də geniş bəhs olunmuşdur. Qeyd edilmişdir ki, Qobustan şəhərinin sakinlərin qaz təchizatının yaxşılaşdırılması məqsədilə 1380 metr qaz xətti dəyişdirilmişdir. Şəhərin “Yeni massiv” adlanan ərazisinin və Xilmilli kəndinin qazlaşdırılması üçün müvafiq tədbirlər görülür. Yaxın aylarda Bədəlli, Şıxzahırlı, Sədəfli, Poladlı, Yekəxana və Təsi kəndlərinin qazlaşdırılması məqsədilə işlərə başlanılacaqdır.

Hazırda Qobustan şəhər əhalisinin qismən, Bədəlli və Təsi kəndləri isə tam şəkildə içməli su ilə təmin olunur. Yığıncaqda rayon mərkəzinin və 7 kəndin su təchizatını tamamilə həll edəcək kəmərin çəkilişinin sürətləndirilməsi ilə əlaqədar məsələlər barədə ətraflı müzakirələr aparılmış, lazımı tapşırıqlar verilmişdir.

Hesabat yığıncağında regionların sosial-iqtisadi inkişafına dair ikinci Dövlət Proqramından irəli gələn vəzifələrin icrası ilə əlaqədar qarşıda duran vəzifələrdən ətraflı bəhs olunmuşdur.

Azərbaycan Respublikasının Prezidenti Administrasiyasının məsul işçisi Niyaz Əliyev hesabat yığıncağında çıxış edərək dövlətimizin başçısı İlham Əliyevin rəhbərliyi ilə ölkəmizdə sosial-iqtisadi sahələrdə qazanılan uğurlardan, habelə ölkə rəhbərinin tapşırıqlarından irəli gələn vəzifələrlə əlaqədar regionlarda, o cümlədən Qobustanda görüləcək təxirəsalınmaz vəzifələrdən danışmışdır.