Qubanın Qonaqkənd qəsəbəsində yeni mədəniyyət evi tikilib
Quba, 16 may, Elxan Yusifli, AZƏRTAC
Qubanın Qonaqkənd qəsəbəsində tikilən yeni mədəniyyət evində 55 nəfərlik tamaşa zalı, oxu zalı və başqa xidməti otaqlar fəaliyyət göstərəcək.
AZƏRTAC-ın bölgə müxbiri xəbər verir ki, qəsəbədə tikilən yeni mədəniyyət evində mədəni tədbirlərin keçirilməsi, yerli folklor qruplarının, dərnəklərin fəaliyyəti nəzərdə tutulub.
Ümumi sahəsi 350 kvadratmetr olan binada son tamamlama işləri həyata keçirilir. Birmərtəbəli binanın dam örtüyü vurulub, qapı və pəncərələri qoyulub. Divarların boyanması başa çatdıqdan sonra daxili tərtibat və həyətin abadlaşdırılması işləri görüləcək.
Qubanın qədim yaşayış məntəqələrindən olan Qonaqkənd qəsəbəsində son illər bir çox sosial infrastruktur layihələri icra olunub. 2019-cu ildə rayon mərkəzindən 47 kilometr məsafədə yerləşən yaşayış məntəqəsinə müasir yol çəkilməsinin ardınca, qəsəbənin qazlaşdırılması həyata keçirilib.
Bölmənin digər xəbərləri
