Ramin Bayramlı: Bəzi regionlarda qaydalara məsuliyyətlə yanaşılmır
Bakı, 15 may, AZƏRTAC
Bəzi regionlardan əldə olunan statistik göstəricilər təəssüf ki, həmin bölgələrdə hələ də qaydalara məsuliyyətlə yanaşılmadığını göstərir. Həmin bölgələrdə ciddi problemlər yaşanır.
AZƏRTAC xəbər verir ki, bunu bu gün Nazirlər Kabineti yanında Operativ Qərargahın təşkil etdiyi mətbuat konfransında Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Ramin Bayramlı deyib.
Onun sözlərinə görə, son günlərdə intensiv olmaqla indiyədək Yevlaxda 64 sakin koronavirusa yoluxub: "Burada qaydalara əməl olunması üçün daha ciddi tədbirlər görməyə ehtiyac görürük.
Yoluxmanın yüksək olduğu bölgələrdən biri də Lənkəran rayonudur. Orada bir neçə kənd xüsusilə fərqlənir. Boladi kəndində 16, Şiləvarda 8, Çağlaserdə 31, Vilvan kəndində 11 fakt aşkarlanıb. Bu göstəricilər qətiyyən bizi qane edə bilməz. Həmin bölgələrinin sakinləri xüsusi karantin rejiminin tələblərinə əməl etmirlər. Qeyd edim ki, ölkədə karantin rejimi mayın 31-dək davam edir.
Gəncədə aparılan epidemiyaya qarşı tədbirlər nəticəsində isə yayılmanın məhdudlaşdırılmasını təmin etmək, epidemiyanın qarşısını almaq mümkün olub".
Onun sözlərinə görə, ölkədə aktiv halların sayı aprelin 13-nə kimi artıb, aprelin 27-nə qədər davamlı olaraq azalıb. Aprelin 27-dən mayın 2-dək bu rəqəm sabitləşib. Mayın 2-dən etibarən isə yenidən davamlı şəkildə artıb.
Yoluxma sürəti 20-31 mart tarixlərində ən yüksək olub. Aktiv halların iki dəfə artması təxminən 7-8 gün təşkil edib. Aprelin əvvəlindən başlayaraq tətbiq edilən məhdudiyyətlər nəticəsində yoluxma sürəti tədricən azalıb və aprelin 5-15-də minimuma enib. Bu zaman aktiv halların da sayının 46 faizə qədər azalması qeydə alınıb. Mayın əvvəlindən yoluxma hallarının sayı sürətlə təkrar artmağa başlayıb. Bu da məhdudiyyətlərin aradan qaldırılması ilə bağlıdır.
Bölmənin digər xəbərləri
