RİQADA AZƏRBAYCAN-LATVİYA HÖKUMƏTLƏRARASI KOMİSSİYANIN 2-Cİ İCLASI KEÇİRİLƏCƏKDİR
İqtisadi İnkişaf Nazirliyinin mətbuat xidmətindən AZƏRTAC-a bildirmişlər ki, iyulun 15-də Azərbaycan və Latviya arasında iqtisadi, elmi-texniki və mədəni əməkdaşlıq üzrə Hökumətlərarası Komissiyanın ikinci iclası keçiriləcəkdir. Bu məqsədlə Komissiyanın həmsədri, iqtisadi inkişaf naziri Heydər Babayevin rəhbərlik etdiyi nümayəndə heyəti iyulun 14-də Riqa şəhərinə yola düşəcəkdir.
Azərbaycan tərəfdən Komissiyaya Xarici İşlər, Maliyyə, Sənaye və Energetika, Mədəniyyət və Turizm, Təhsil, Rabitə və İnformasiya Texnologiyaları, Gənclər və İdman nazirliklərinin, eləcə də Milli Bankın yüksək vəzifəli rəsmiləri daxildir. Latviya tərəfdən isə bu ölkənin müvafiq dövlət qurumlarının nümayəndələri təmsil olunurlar.
İclasda Azərbaycan və Latviya arasında iqtisadi əlaqələrin mövcud vəziyyəti və iqtisadiyyatın müxtəlif sahələri üzrə əməkdaşlığın inkişaf perspektivləri müzakirə olunacaqdır. İclasın yekunlarına dair protokolun imzalanacağı gözlənilir.
Səfər çərçivəsində nazir Heydər Babayevin Latviyanın bir sıra dövlət qurumlarının rəhbərləri ilə görüşlərinin keçirilməsi də nəzərdə tutulmuşdur.
Azərbaycan və Latviya arasında iqtisadi, elmi-texniki və mədəni əməkdaşlıq üzrə Hökumətlərarası Komissiyanın ilk iclası 2007-ci ilin martında Bakıda keçirilmişdir.
Bölmənin digər xəbərləri
