Rizvan Nəbiyev: “Zayed İnsan Qardaşlığı Mükafatı” Prezident İlham Əliyevin sülhsevər siyasətinin beynəlxalq təsdiqidir
Bakı, 5 fevral, AZƏRTAC
Birləşmiş Ərəb Əmirliklərinin banisi, mərhum Şeyx Zayed bin Sultan Al Nəhyanın adını daşıyan nüfuzlu “Zayed İnsan Qardaşlığı Mükafatı”na Azərbaycan və Ermənistan arasındakı sülh təşəbbüsünə görə dövlətimizin başçısı İlham Əliyevin layiq görülməsi ölkəmizin regionda sülhün və əməkdaşlığın təşviqində oynadığı mühüm rolun beynəlxalq ictimaiyyət tərəfindən yüksək qiymətləndirilməsidir.
Bu sözləri AZƏRTAC-a açıqlamasında Milli Məclisin deputatı Rizvan Nəbiyev səsləndirib.
O xatırladıb ki, dövlətimizin başçısına ünvanlanan təbriklərə qoşulan Türkiyə Prezidenti Rəcəb Tayyib Ərdoğan videomüraciətində sülh, təhlükəsizlik, rifah və sabitlik üçün irəli sürülən bütün təşəbbüsləri səmimi-qəlbdən dəstəklədiyini vurğulayıb, Prezident İlham Əliyevin atdığı cəsarətli addımların sülhün təmin olunmasında mühüm rol oynadığını qeyd edib. Pakistan Baş naziri Məhəmməd Şahbaz Şərif isə ölkəmizin bu istiqamətdəki fəaliyyəti ilə bağlı Prezident İlham Əliyevin müdrik rəhbərliyi altında Azərbaycanın diqqətəlayiq nailiyyətlərini qürurla alqışladığını, bu sazişin yalnız iki ölkə üçün deyil, bütövlükdə region üçün yeni dövrün başlanğıcı olduğunu deyib.
“Zayed İnsan Qardaşlığı Mükafatı” yalnız humanizm və qardaşlıq ideyalarının təbliği ilə seçilən şəxslərə və təşəbbüslərə verilir. Azərbaycan Prezidentinin bu yüksək mükafata layiq görülməsi isə ölkəmizin postmünaqişə dövründə barışıq, dialoq və sabitlik xəttinə sadiqliyinin bariz göstəricisidir. Məhz Prezident İlham Əliyevin siyasi iradəsi və prinsipial mövqeyi nəticəsində Cənubi Qafqazda yeni reallıqlar formalaşıb, sülh gündəliyi əsas prioritetə çevrilib. Azərbaycan tərəfi hər zaman ədalətə əsaslanan, beynəlxalq hüquqa söykənən sülh sazişinin imzalanmasının tərəfdarı olub. İşğaldan azad edilmiş ərazilərdə aparılan bərpa və quruculuq işləri, regionda iqtisadi əlaqələrin və nəqliyyat-kommunikasiya xətlərinin açılması təşəbbüsləri ölkəmizin sülhə verdiyi praktiki töhfələrin göstəricisidir. Qazaxıstan Prezidenti Kasım-Jomart Tokayev də mükafatlandırma mərasimində yayımlanan müraciətində sülh prosesini “tarixi əhəmiyyətli dönüş nöqtəsi” olaraq yüksək dəyərləndirdi”, - deyə deputat əlavə edib.
R.Nəbiyev, həmçinin qeyd edib ki, “Zayed İnsan Qardaşlığı Mükafatı”nın sülh sazişi kontekstində təqdim olunması Azərbaycan-Ermənistan normallaşma prosesinin artıq regional çərçivədən çıxaraq qlobal miqyasda sülh modeli kimi qəbul edildiyini göstərir. Bu, eyni zamanda, Birləşmiş Ərəb Əmirliklərinin humanitar diplomatiya və sülh təşəbbüslərinə verdiyi önəmin təzahürüdür.
“Bu mükafat Prezident İlham Əliyevin liderliyi ilə yürüdülən uzaqgörən, sülhsevər siyasətin, xalqlar arasında düşmənçilik deyil, əməkdaşlıq və qarşılıqlı hörmət mühitinin formalaşdırılmasına xidmət edən strategiyanın beynəlxalq səviyyədə təsdiqidir. Əminliklə demək olar ki, bu qiymətləndirmə Cənubi Qafqazda davamlı sülhün bərqərar olması yolunda əlavə stimul yaradacaq və regionun gələcək inkişafına mühüm töhfə verəcək. Özbəkistan Prezidenti Şavkat Mirziyoyevin sözləri ilə desək, bu razılaşma bütövlükdə regionda sabitliyi təmin etmək üçün atılmış tarixi addımdır. ...sülh yalnız dialoq və qarşılıqlı hörmət əsasında mümkündür və bu addımlar xalqı və ölkələri birləşdirən gələcəyə aparır”, - deyə o vurğulayıb.
Bölmənin digər xəbərləri
