Rusiya Ermənistanın Aİ ilə yaxınlaşmasının Aİİ qaydalarına zidd olduğu qənaətindədir
Moskva, 27 iyun, AZƏRTAC
Rusiya Ermənistan hökumətinə Avropa İttifaqı (Aİ) ilə yaxınlaşma istiqamətində qəbul edilən normalarla Avrasiya İqtisadi İttifaqı (Aİİ) çərçivəsində öhdəliklər arasında ziddiyyət olduğunu göstərən rəsmi məktub hazırlayır.
AZƏRTAC xəbər verir ki, bu barədə jurnalistlərə Rusiya Baş nazirinin müavini Aleksey Overçuk məlumat verib.
O, sənədin erməni həmkarı Mher Qriqoryana göndəriləcəyini qeyd edib.
Baş nazirin müavininin sözlərinə görə, Rusiya hesab edir ki, Ermənistanın bəzi hərəkətləri, xüsusən də Aİİ-dən kənar ölkələrin məhsullarının sertifikatlaşdırılması qaydalarını sadələşdirən tənzimləmələr Aİİ-nin vahid tələblərinə ziddir.
"Biz müvafiq tədbirlərin tətbiqi məsələsini nəzərdən keçirəcəyik", - deyən Overçuk vurğulayıb və izah edib ki, Ermənistanın qanunvericilik bazasında onun standartlarına cavab verməyən məhsulların Aİİ-nin daxili bazarına daxil olmasına səbəb ola biləcək müddəalar peyda olur. Bu məsələ baxılması üçün Avrasiya İqtisadi Komissiyasının Şurasına təqdim edilir.
Rusiya Baş nazirinin müavini həmçinin xatırladıb ki, Ermənistan parlamenti ölkənin Avropa İttifaqına daxil olmaq istəyini bəyan edən qanun qəbul edib. "Biz Ermənistanda bu istiqamətdə gedən prosesləri diqqətlə izləyirik. Təbii ki, biz həmişə erməni xalqının seçiminə hörmətlə yanaşacağıq, lakin baş nazir Nikol Paşinyanın təsdiq etdiyi kimi, Aİİ və Aİ-yə eyni vaxtda üzvlük mümkün deyil", -deyə Overçuk bildirib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
