Rusiya Gürcüstana ixrac etdiyi taxılın vergisini 14,5 faiz artıracaq
Tbilisi, 9 yanvar, AZƏRTAC
Gürcüstanın əsas buğda idxalçısı olan Rusiya taxılın ixrac vergisini yenidən artırır.
AZƏRTAC yerli mətbuata istinadla xəbər verir ki, yanvarın 11-dən Rusiyadan idxal olunan buğdanın bir tonu üçün ixrac vergisi 4766,30 rubl (60 dollar) olacaq. Bu da, əvvəlki illə müqayisədə 14,5 faiz çoxdur.
Qeyd edək ki, hazırda Rusiyadan buğda ixracına bir ton üçün 4160,9 rubl tələb olunur. Rusiyada uzun müddətdir ki, buğda ixracı vergisi qüvvədədir və bu ildən idxalçı ölkələr üçün qiymətləri artırır.
Dünyanın digər ölkələri kimi Gürcüstan da ehtiyatlarını unla doldurmağa çalışır və Rusiya hələlik unun ixracına vergi tətbiq etməyib.
Gürcüstan Milli Statistika Xidmətinin məlumatına görə, 2022-ci ilin 11 ayında ölkə 55,4 milyon ABŞ dolları dəyərində 155 min 704 ton buğda idxal edib. Bu da 2021-ci ilin eyni dövrü ilə müqayisədə 56 faiz azdır. 2021-ci ildə Gürcüstan 88,7 milyon ABŞ dolları dəyərində 352 min 719 ton buğda alıb. Ənənəvi olaraq, əsas idxalçı Rusiyadır.
Ümumilikdə Gürcüstan 8 ölkədən məhsul alıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
