RUSİYA XİN-İN VƏ BAEA-NIN MƏSLƏHƏTLƏŞMƏLƏRİ DAVAM EDİR
Rusiyanın xarici işlər naziri S.Lavrov ilə BAEA-nın başçısı Məhəmməd əl-Baradei arasında oktyabrın 6-da Rusiya XİN-də keçirilmiş məsləhətləşmələr zamanı BAEA Müdirlər Şurasının gündəliyində duran məsələlər, nüvə silahının yayılmaması problemləri, nüvə təhlükəsizliyinə dair bir sıra məsələlər müzakirə olunmuşdur. Görüşdə nüvə silahının yayılmaması haqqında müqavilənin bütün iştirakçılarına nüvə yanacağının zəmanətlə göndərilməsini təmin edən yolların axtarılması məqsədi ilə nüvə yanacağı məsələlərinə dair geniş fikir mübadiləsi aparılmışdır.
S.Lavrov demişdir ki, Rusiya Məhəmməd əl-Baradeinin fəaliyyətini dəstəkləyir. BAEA-nın başçısı bildirmişdir ki, Rusiya təşkilatın işinə dəyərli töhfə verir və onun nüvə sahəsində fəaliyyətinin bütün növlərinə düşünülmüş şəkildə yanaşır. O demişdir ki, görüş zamanı “Nüvə enerjisindən geniş istifadə, habelə bu istifadə ilə bağlı ideyalar” məsələsini qaldırmaq niyyətindədir.
İranın nüvə proqramı məsələsi də danışıqların gündəliyinə salınmışdı. BAEA-nın baş direktoru demişdir ki, “Rusiyanın rəyi bizim üçün çox vacibdir”.
Sergey Lavrov görüşdən sonra bildirmişdir ki, BAEA-nın İrandakı fəaliyyəti nüvə silahının yayılmamasının qorunub saxlanması üçün yeganə vasitədir. Onun sözlərinə görə, Rusiya bu məsələdə “Avropa üçlüyü” - Böyük Britaniya, Fransa və Almaniya ilə sıx qarşılıqlı fəaliyyət göstərmişdir və bundan sonra da fəaliyyət göstərəcəkdir.
Bölmənin digər xəbərləri
