RUSİYANIN AZƏRBAYCANDAKI FÖVQƏLADƏ VƏ SƏLAHİYYƏTLİ SƏFİRİ NİKOLAY RYABOVUN ÇIXIŞI
- Çox hörmətli cənab Prezident!
Çox hörmətli cənab Milli Məclisin sədri!
Hörmətli xanımlar və cənablar!
Hörmətli səfir həmkarlarım!
Əziz moskvalı qonaqlar, dostlar!
Yenidən tikilmiş bu məbədin açılışı, həqiqətən, bayramdır. Bu, belə gözəl binanın yenidən özünə qaytarıldığı Bakı şəhərinin bayramıdır. Bu, ixtiyarlarına Bakı və Xəzəryanı yeparxiyanın baş kilsəsi verilmiş bütün dindarların, pravoslav icmasının bayramıdır. Sözsüz ki, bu, qeyri-adi məbəddir. Çünki burada rus pravoslavlığının sabit prinsipləri və gözəl Azərbaycan memarlığı bir-biri ilə üzvü şəkildə birləşmişdir. Heydər Əliyeviç, mənə elə gəlir ki, bütün postsovet məkanında çətin ki, ikinci belə abidə olsun. Bu məbəd buraya gələnləri, sadəcə olaraq, heyrətə gətirir və ruhlandırır.
Mən bu məbədi yenidən inşa etmiş mesenatın ünvanına deyilən minnətdarlıq sözlərinə qoşulmaq istəyirəm. Rusiyalı sahibkar və ictimai xadim olan Aydın Qurbanov milliyyətcə azərbaycanlı, mənən isə bakılıdır. Görünür, tale-qismət belə xeyirxah işləri görməyə çağırdığı insanları həmişə düzgün axtarıb tapır. Çox sağ olun, siz, həqiqətən, Azərbaycan xalqının ən gözəl məziyyətlərinin təcəssümüsünüz, siz Rusiyanın da say-seçmə adamlarının layiqli nümayəndəsisiniz.
Azərbaycan Prezidenti, çox hörmətli Heydər Əlirza oğlu Əliyevin başçılığı ilə indiki respublika rəhbərliyinin yeritdiyi siyasət olmasaydı, sözsüz ki, belə bir bayram da olmazdı.
Azərbaycan ta qədim dövrlərdən özünün dini dözümlülüyü ilə şöhrət qazanmışdır. Bəlkə elə ona görə ki, azərbaycanlıların qəlbindən, Azərbaycan xalqının qəlbindən bir çox dinlər - zərdüştilik də, xristianlıq da, müsəlmanlıq da keçmişdir. Buna görə də Azərbaycan dünyanın heç vaxt heç bir dini toqquşmaların, heç bir dini ədavətin olmadığı bir neçə ölkəsindən biridir. Elə bu bayram da Azərbaycan xalqı üçün hadisələrin təbii gedişidir. İkiqat sevindirici hal budur ki, Azərbaycanın indiki rəhbərliyi bu çoxəsrlik, minillik, mən deyərdim ki, ənənəyə çox müdrikcəsinə və ardıcıllıqla riayət edir.
Bütün bunlar Rusiyada da xoş hisslər və əks-səda doğurur. 2001-ci ilin yazında Azərbaycan Prezidentinin və Qafqaz Müsəlmanları İdarəsi başçısının dəvəti ilə Moskvanın və bütün Rusiyanın Patriarxı II Aleksi Bakıda səfərdə olmuşdur. Bu, Rusiya Patriarxının müsəlman ölkəsinə ilk səfəri idi. Burada gördükləri onun qəlbini görüşdüyü hər bir kəsə əlbəttə ki, ilk növbədə, Azərbaycan Prezidentinə minnətdarlıq hissi ilə doldurmuşdur.
Yadınızdadırsa, Patriarx Azərbaycanın indiki vəziyyəti ilə tanış olduqdan, qaçqın-köçkünlərə baş çəkdikdən sonra öz qardaşı və dostu hörmətli şeyxlə bir yerdə Dağlıq Qarabağ probleminin nizama salınmasına səy göstərən Azərbaycan və Rusiya prezidentlərinə kömək etmək arzusunda olduğunu bildirdi. Bu, münasibətlərimizin çox səciyyəvi və tipik xüsusiyyətidir.
Demək lazımdır ki, bu ölkələrin dini rəhbərləri yaxın dostdurlar, prezidentlər də onları həvəslə qəbul edir və onlarla məsləhətləşirlər. Bütün bunlar o deməkdir ki, xalqların, dinlərin yaxınlığı boş sözlər, boğazdan yuxarı verilən bəyanatlar yox, həqiqətdir.
Çox hörmətli Heydər Əliyeviç, bu gün mən belə bayramlara görə Sizə öz minnətdarlığımı bildirirəm. Bu sübut edir ki, ikitərəfli münasibətlər, - bu hadisə isə, həmin münasibətlər çərçivəsindədir, - yüksələn xətlə inkişaf edir, onun əhatə dairəsi getdikcə genişlənir, səmərəli olur və dərinləşir.
Mən burada iştirak edənlərin hamısını bu məbədin açılışı münasibətilə təbrik edirəm, istərdim ki, nə bu məbədə, nə də Azərbaycan torpağına heç vaxt bir mərmi belə düşməsin, yadellilərin, şər qüvvələrin ayağı bu torpağa heç vaxt dəyməsin. Mən Azərbaycan xalqına sülh, firavanlıq arzulayıram. Azərbaycan Respublikasının Prezidenti Heydər Əlirza oğlu Əliyevə cansağlığı, xoşbəxtlik, çoxcəhətli fəaliyyətində uğurlar arzulayıram. Çox sağ olun.
X X X
Azərbaycan Prezidenti Heydər Əliyev mərasimdə nitq söylədi.
(Dövlətimizin başçısının nitqi qəzetin birinci səhifəsində dərc olunur).
X X X
Sonra Azərbaycan Prezidenti Heydər Əliyev Bakı və Xəzəryanı bölgənin yepiskopuna ölkənin yüksək mükafatını - “Şöhrət” ordenini və təltif barədə Fərmanı təqdim etdi.
X X X
Bakı və Xəzəryanı bölgənin yepiskopu Aleksandr mərasimdə çıxış etdi.
Bölmənin digər xəbərləri
